İşğal etilgen Keriçte çiçek ayınıñ 15-nde "Volgoneft" tankerleriniñ qazası neticesinde üç yañı mazut lekesi qayd etildi. Toplam tarqalğan yerniñ uzunlığı — 1300 metr.
İşğalli Keriç yolbaşçısı Oleğ Katorgin Telegramda bunı bildirdi.
"Bugün saba, Nimfey yolu, Ğeroyevska soqağı ve Nıjnöprımorska soqağı yanındaki qumlu yerlerde az miqdarda üç kiçik şekilli mazut lekesi qayd etildi", — dep yazdı o.
Keriçte çıqqan mazut aqqında Katorgin çiçek ayınıñ 14 ve 13 künleri haber etti.
Hatırlatamız ki, çiçek ayınıñ 11-nde işğalli Qırım yolbaşçısı Sergey Aksönov bütün plâjlar mazuttan temizlengenini bildirip, "küçlü lekeler kurort mevsimi ketişatına tesir etmeycek", dep işandırdı. Lâkin ekologlar bu sözlerni inkâr etip, mazut alâ daa vahşi plâjlarda ve yalı kenarınıñ qayalı yerlerinde qala, dep yaza "Agentstvo. Novosti" saifesinde derc etildi.
"Qırımnıñ esas şeer plâjları temizlendi. Amma daa az irişile bilgen yerlerde, er vaqıt raatlanğanlar bulunğan bütün bu "vahşi" plâjlarda mazut bar. Ve eñ yamanı — taş ve qayalarda onıñ sayısı ep arta", — dep neşirge ekolog İğor Şkradük tarif etti.
İşğalcilerniñ aytqanlarına baqmadan, Qırım plâjlarınıñ kirli olğanı aqqında Milliy muqavemet merkezi de haber etti.
"Lâkin Keriç boğazında tankerler qazasından soñ vaziyet normalden uzaqtır. Büyük miqyaslı mazut tökülmesi ekologik felâket oldı. Amma 340 açıq plâj, "turistik yollar" ve "turistik aqımınıñ artması" aqqında laflar bar. Milliy muqavemet merkezi qayd etti ki, işğal etilgen Qırımğa barmaq — raatlıq degil de, telüke. "Qırım köprü" qanuniy maqsat olaraq qala, işğalci memuriyet ise — sahteliklerniñ menbası", — dep aytıla haberde.
Keriç boğazında batqan Rusiye tankerlerinden mazutnıñ çıqqan yeri de uydu resimlerinde körüne. RNBO yanındaki Sahte malümatnen küreş merkezi (SHKM) haber etti. Neft mahsulatı qaza neticesinde suvuqlıqtan tübüne tüşti — sıcaq kelgende olar yuqarığa çıqacaq.
Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında "Volgoneft 212" ve "Volgoneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volgoneft-212" ve "Volgoneft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volgoneft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
2025 senesi qara qış ayınıñ 4-nde işğal etilgen Sevastopolda (Aqyar) ilk qış ayınıñ 15-nde Keriç boğazında eki tankerniñ qazası sebebinden bölge emiyetli fevqulâde vaziyet rejimi ilân etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
