Qara qış aynıñ 4 işğal etilgen Aqyarda ilk qış aynıñ 15 Keriç boğazında eki tankerniñ qazası içün Qırım yalısı kirlengeni sebebinden vilâyet manalı fevqulâde rejimini ilân ettiler.
Bunıñ aqqında şeerniñ işğal gubernatorı Mıhaylo Razvojayev Telegram-da bildirdi.
"Vaziyetke dair operativ ştabını şahsen reber etem, bugün Aqyarda vilâyet manalı FV rejimi ilân etilgen", – qayd etti o.
Razvojayevniñ sözlerine köre, şimdi mazutnıñ kirlenüv alâmetine köre Aqyar yalısını tedqiq etmege devam eteler.
Bundan evel Aqyar "gubernatorı" Mıhaylo Razvojayev, mazut, aqyar limanına kirgeni haber ete. Ayrıca, Balıqlava limanında yermay lekesini taptılar.
Hatırlatayıq ki, qara qış aynıñ 4-nde işğal etilgen Qırımda Keriç boğazında eki rusiye tankeri "Vologneft"-niñ qazası sebebinden yalı üzerinde mazut kirlenüviniñ eki yañı merkezini qayd ettiler. Miqyaslı ekologik meselesi, Qız-Aul feneri ve "Opuk" tabiat qoruğı yanındaki yalısını qaplap ala.
Qara qış ayınıñ 2-nde işğal etilgen Qırımnıñ yalısında, ilk qış ayınıñ 15-nde Keriç boğazında "Volganeft" Rusiye tankerlerinen yüz bergen qazadan soñ, eki yañı neft mahsulatınen kirlenilgen yerler tapıldı. Aynı künü Rusiye FVN, kirlenilgen merkezlerniñ yoq etüvi aqqında esap bergen.
Bundan da ğayrı, ruslar, batqan tankerlerde bozulğan konteynerlerniñ sayısını belgilediler ve dünyada "ağır" mazutnı suv qalınlığından çıqarmaq içün "sınalğan tehnologiyalar yoq", dep bildirdi "Deñiz qurtaruv hızmeti".
Ukrain deñiz ekologiyası ilmiy merkeziniñ müdiriniñ muavini Viktor Komorinniñ Suspilne Qırımğa bildirgenine köre, Keriç boğazında yüz bergen qaza sebebinden ekologiya içün eñ problemli aqibetler — bu, Qara deñiz akvatoriyasında balıq, yunus balıq ve quşlarğa mazutnıñ ketirilmesi neticesinde keskin intoksikatsiyadır.
Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında "Volagneft 212" ve "Volagneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volganeft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volganeft-212" ve "Volganeft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volganeft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
Telegram, WhatsApp ve Facebookta Suspilne Qırım haberlerine abune oluñız
