İlk qış ayınıñ 15-nde Keriç boğazı yanında eki Rusiye gemisi "Volgoneft 212" ve "Volgoneft 239" batıp başladı. Ukraina SQniñ Arbiy-deñiz quvetleriniñ nutuqçısı Dmıtro Pletentçuk bildirdi ki, bu eki tanker, kerçekten de arbiy sınıf gemisi, gemilerniñ areket qaidelerine riayet etmeden deñizge çıqtı.
İlk qış ayınıñ 16-nda o, "Suspilne. Studiya"nıñ canlı yayınında bu aqqında haber berdi.
"Deñizde olğan ava şaraiti açıq deñizde bulunmaq içün uyğun olmağan edi... Er vaqıt olğanı kibi, ruslar bozmaq mümkün olğan er şeyni bozdılar", — dep qayd etti Pletçençuk.
Onıñ aytqanına köre, furtuna mevsimi devam ete ve baarniñ ortasına qadar bitecek. O vaqıt er şeyni ögrenmek qıyın olacaq, ve ruslarğa tankerlerni suvdan çıqarmaq qıyın olacaq. Aynı zamanda bu kibi furtuna şaraiti Rusiye Qaradeñiz flotunıñ arbiy gemileriniñ körfezlerden çıqması ve qanatlı raketalarnıñ qullanılması boyunca navigatsiyanı qıyınlaştıra.
Bundan da ğayrı, USQniñ Arbiy deñiz quvetleriniñ nutuqçısı, bu tankerler eski, 50 yaşından büyük olğanını qayd etti. Olarnı planlaştırılğanından turaqta daa çoq tutmaq mümkün edi, amma geminiñ kapitanı bütün bu faktorlarnı köz ögüne alıp, bütün telükelerni esaplap çıqmaq kerek edi.
"Lâkin, elbette, Rusiye yermayı ya da başqa yağ malzemelerini taşuv, olar içün vatandaş gemileriniñ havfsızlığı talaplarına riayet etmekten daa müimdir", — dep qayd etti Pletçençuk.
Onıñ qayd etkenine köre, bu, gemilerniñ deñiz qaidelerini bozğan birinci adise degil. Şu cümleden, yalı kenarı ihtarlarına riayet etmemesi ve identifikatsiya sistemasınıñ daima söndürilmesi aqqında söz yürsetile.
Ukraina SQniñ Arbiy-deñiz quvetleriniñ matbuat hızmeti bildirdi ki, Keriç boğazında qazağa oğrağan gemilerden biri de bu sistemanı devire-devire söndürgen edi.
Bundan da ğayrı, Keriç boğazı Ukraina tarafından bir yıldır vatandaş gemileri içün resmen qapatıldı. Amma ruslar bu qaidelerge riayet etmeyler, dep qoştı o.
Umumen alğanda, Rusiye deñiz flotunıñ vaziyeti bayağı qıyın. Olar bu astyapınıñ inkişafına yatırım yapmadılar, ve onı ğayrıdan tiklemek içün çoq vaqıt kerek olacaq, dep qayd etti Pletçençuk.
Keriç boğazında qazası aqqında belli olğanı
İlk qış aynıñ 15 Keriç boğazı yanında "Vologneft 212" ve "Vologneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna veye yaramay avası içün tankerlerniñ bozuluvı olğan. İlk qış aynıñ 15 qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andrey Klimenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Telegram, WhatsApp ve Facebookta Suspilne Qırım haberlerine abune oluñız
