Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlendi. Etraftaki müit qoruyıcıları, felâketniñ miqyası daa büyük ola bilecegini tenbiley. Quşlarnıñ kütleviy ğayıp oluvı ve siyrek olğan deñiz ayvanları içün telüke mütehassıslarnı qasevetlendire.
Greenpeace teşkilâtınıñ temsilcileri BBCge bunı bildirdiler.
Radar resimlerinden körüne ki, tankerniñ batqan qısmından mazut aqmağa devam ete. Kirlilik, quşlarnıñ kütleviy ğayıp olmasına sebep oldı. Olarnı mazuttan qurtarıp olsalar bile, yağnıñ toksik tesiri ölümli ola bile. Qara deñizde yaşağan az rastkelgen kitli ayvanlar, şu cümleden yunuslar ve deñiz domuzları da telükege oğradı.
Greenpeace ekologları daa uzun müddetli aqibetlerni tahmin eteler — suv ve qaya sahilleriniñ kirlenüvi, bu ise hususan çeşitlilik içün telükeli. Qayalarnı temizlemek daa qıyın ola, çünki bu ceryan sıq-sıq ekosistemlerge zarar ketire.
Keriç boğazında qazası aqqında belli olğanı
İlk qış aynıñ 15 Keriç boğazı yanında "Vologneft 212" ve "Vologneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna veye yaramay avası içün tankerlerniñ bozuluvı olğan. İlk qış aynıñ 15 qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andrey Klimenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Telegram, WhatsApp ve Facebookta Suspilne Qırım haberlerine abune oluñız
