İlk qış aynıñ 21 işğal etilgen Qırımda Keriç "akimiyeti", şeer plâjlarında ilk qış aynıñ 15 Keriç boğazında batqan eki rusiye tankeri "Vologneft 212" ve "Vologneft 239"-ndan mazutnı tapıp belediye soylü fevqulâde vaziyetini (FV) kirsetken.
Bunı Qırım "nazirler şurasınınh baş" muavini İgor Mihayliçenko haber etti, onıñ muracaatını ise – öz İnstagram saifesinde "Krım 24" propagandalı telekanalı paylaşqan.
Bundan ğayrı, Mihayliçenkonıñ sözlerine köre, Keriç rayonında (sabıq Lenin rayonı) belediye soylü fevqulâde vaziyeti kirsetilgen.
Hatırlatayıq ki, ilk qış aynıñ 21 Keriçteki işğal memuriyeti, Keriç plâjlarında suv ösümlüklerinen qarıştırılğan mazut qalımtılarnı qayd etkenini bildirdi.
Keriç boğazındaki qazası aqqında belli olğanı
Keriç boğazı yanında "Vologneft 212" ve "Vologneft 239" eki rusiye gemisi batmağa başladı. Bir geminiñ kenarında ekipajnıñ 13 azası buluna, başqasınıñ kenarında ise – 14.
Evelden, vaqia sebebi furtuna veye yaramay avası içün tankerlerniñ bozuluvı olğan. İlk qış aynıñ 15 qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñtokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andrey Klimenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.
İlk qış ayınıñ 15-nde "Volgoneft 212" ve "Volgoneft 239" eki Rusiye tankeriniñ qazası neticesinde çıqqan mazut Qara deñiz ekosisteması içün "felâketli aqibetler"ge yol aça, dep Ukraina Etraftaki müit qoruv ve tabiat resursları nazirligi bildirdi.
"Yeşil mektüp" cemaat teşkilâtınıñ reisi Vladıslav Balinskıy "Suspilne. Studiya"nıñ canlı yayınında Qara deñizde soñki on yıllarnıñ eñ büyük ekologik felâketlerinden biri olğanını aytqan.
İlk qış ayınıñ 17-nde Qara deñizdeki Kavkaz limanı civarında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu, "Volgoneft" tankerleriniñ mazut taşığanından üçünci adisedir.
İlk qış ayınıñ 19-nda Areket telükesizligi ve deñiz naqliyatını qullanuv qaidelerine riayet etmemege qabaatlanğan ekipaj azasınıñ ölümine ketirgen "Volgoneft-212" tankeriniñ kapitanı eki ayğa, 2025 senesi kiçik aynıñ 17-ne qadar apiske alındı. "Volgoneft-239" gemisiniñ kapitanı ise aynı müddetke ev apsinde tutıldı.
İlk qış ayınıñ 20-nde Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlendi. Etraftaki müit qoruyıcıları, felâketniñ miqyası daa büyük ola bilecegini tenbiley.
Aynı zamanda ilk qış aynıñ 20-nde Keriç boğazında Gvineya-Bisau bayrağınen areket etken "Gam Express" gemisi, ğam işaretini kösterip yardım içün muracaat etken.
Telegram, WhatsApp ve Facebookta Suspilne Qırım haberlerine abune oluñız
