Перейти до основного змісту
"Qorqu numayışı": Ukraina TİN Putinniñ Keriç boğazında tankerlerniñ qazası aqqında aytqanına cevap berdi

"Qorqu numayışı": Ukraina TİN Putinniñ Keriç boğazında tankerlerniñ qazası aqqında aytqanına cevap berdi

Ukraina Tış işleri nazirligi bildirdi ki, Rusiye lideri Vladimir Putinniñ Keriç boğazında tankerlerniñ qazağa oğrağanından qasevetlengeni açıq-aydın numayışlı körüne.

Tış işleri nazirliginiñ spikeri Ğeorgiy Tıhıy bunı bildirdi.

Onıñ aytqanına köre, Putinniñ beyanatları açıqtan-açıq numayışqa oşay, çünki keçken sene ilk qış ayınıñ 15-31 künleri Qara deñizde mazut aqımları devam etti ve Rusiye akimiyeti aqibetlerini yoq etmek içün areket etmedi.

"Facia miqyası onıñ deşetli aqibetlerini gizlemek içün pek açıq olğan soñ, Rusiye öz "qayğısı"nı köstermege başladı. Keriç boğazında gemilerniñ qullanıluvı ve deñizcilik havfsızlıq standartlarına riayet etilmegeni sebebinden "Volgoneft-212" ve "Volgoneft-239" tankerleriniñ qazası, Rusiyeniñ gemilerniñ havfsızlığına riayet etmegenini tasdıqlay", — dep qayd etti Ğeorgiy Tıhıy.

O şunı da qoştı ki, Rusiye halqara mesüliyetsizlikni numayış ete, çünki başta meseleni körmemezlikke urdı ve onı çezmege yetiştirmedi, bundan soñ Qara deñiz bölgesini felâket aqibetlerinen tek başına qaldırdı.

Bundan evel Etraftaki müit nazirligi bildirdi ki, Odesa vilâyetiniñ yalısı mazutnen kirlenüv telükesi tışında buluna, şu anda onıñ kirlenüviniñ şartları yoq. Aynı zamanda, Suspilne Qırımğa tefsirinde "Yeşil yapraq" teşkilâtınıñ reisi ve ayatiyatçı Vladıslav Balinskıy, "Volgoneft" tankerleriniñ qazası neticesinde çıqqan neft mahsulatı Odesa vilâyetiniñ yalısına qara qış ayınıñ ortasına qadar kele bile, dep tahmin etti.

Keriç boğazı yanındaki neft mahsulatları tökülgeni sebebinden Ukraina halqara makeme müessiselerine, hususan BMniñ Halqara makemesine, Rusiyege qarşı BMniñ deñiz uquqı boyunca konventsiyasınıñ bozuluvı içün muracaat etmege planlaştıra.

Keriç boğazındaki qaza aqqında ne bilemiz

İlk qış aynıñ 15-nde Keriç boğazı yanında "Volgoneft 212" ve "Volgoneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.

Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.

Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.

Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.

Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.

Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.

İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.

Etraftaki müit nazirligi, ilk qış ayınıñ 15-nde "Volgoneft-212" ve "Volgoneft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.

"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.

İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.

İlk qış ayınıñ 19-nda ekipaj azasınıñ ölümine ketirgen "Volgoneft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.

İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.

İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.

İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.

Telegram, WhatsApp ve Facebookta Suspilne Qırım haberlerine abune oluñız

Топ дня
Вибір редакції
На початок