Keçken yıl ilk qış ayında Keriç boğazında batqan "Volgoneft" tankerleriniñ parçalarını qara yüzüne tek 2026 senesi alıp köterecekler. Gemilerden biriniñ qıçını saban aynıñ başında parça-parça etip qoymağa başladılar.
Bunıñ aqqında RF Naqliyat nazirliginiñ başı Roman Starovoyt bildirdi, yaza TASS rusiye agentligi.
"Müddetleri böyle: bu yıl küz furtunalarnıñ başlanuvından beri mazutnıñ açıq deñizge çıqmağa fırsatını yoq etmek içün batqan qısımlarnıñ cayılmasınıñ toqtatuvını temin etmek kerekmiz. Kelecek sene ise – tehnologiyalarnı alğan soñ, em köfferdamlar em de bütün üç qısımnıñ köterüvini temin etmege tırışacağımız", – denile beyanatta.
RF Naqliyat nazirliginde bildirgenleri kibi, tankerlerniñ qısımlarından baştan türtip turğan elementlerni kesip üstüne çıqaracaqlar, soñ 20 m qadar terenliginde üç imaye inşaatını pekitecekler, olardan er biri 1,5 biñ tonnadan ziyade kelecek. Soñ pompalap mazut çekecekler. Dörtünci devir – üstke köterilüvidir.
Hatırlatayıq ki, saban aynıñ 7 Milliy muqavemet merkezi İşğalciler Keriç boğazında yüz bergen qaza aqibetlerini baş etip olamağanlarını bildirdi. "Volgoneft" tankerleri batqanından üç ay keçken soñ, Azaq deñiziniñ yalısı alâ daa mazutnen kirlenilgen.
"Kreml felâketniñ büyükligini gizlemek içün halqara yardımnı red etti. Neticelerni yoq etmek içün işğalciler studentlerni, şu cümleden VİETdan, iç bir qoruvsız alıp ketti", — dep aytıla haberde.
Qara qış ayınıñ 27-31 künleri Halqara deñiz teşkilâtı (IMO) Keriç boğazında "Volgoneft" tankerleriniñ qazası neticesinde mazut tökülmesiniñ ekologik aqibetlerini muzakere etti.
Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında "Volgoneft 212" ve "Volgoneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volgoneft-212" ve "Volgoneft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volgoneft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
2025 senesi qara qış ayınıñ 4-nde işğal etilgen Sevastopolda (Aqyar) ilk qış ayınıñ 15-nde Keriç boğazında eki tankerniñ qazası sebebinden bölge emiyetli fevqulâde vaziyet rejimi ilân etildi.
Telegram, WhatsApp ve Facebookta Suspilne Qırım haberlerine abune oluñız
