Rusiye Krasnodar ülkesiniñ Arbitraj mahkemesi «Volgoneft 212» ve «Volgoneft 239» tankerleriniñ saiplerini, 2024 senesi ilk qış ayında Keriç boğazında ve Qara deñizde mazut tökülgen soñ ekologik zararlar içün daa 34,2 milliard ruble (19 milliard ğrn) ödemege mecbur etti.
Orta küz ayınıñ 29-ndaki mahkeme qararında bu qayd etile, boş aynıñ 4-nde rusiye mediaları bunı bildirdi.
Mahkeme, tökülüv Anapa, Temrük ve Novorossiysk rayonlarındaki tabiiy topraqlarğa büyük zarar ketirgenini ve Qızıl kitapqa kirgen türler de dahil, tahminen 13,5 biñ quşnıñ ölüminiñ sebebi olğanını tanıdı.
Davada «Volgatransneft», «KamaTransOyl» ve «Kama Şipping» şirketleri cevapkâr edi. Tazminatnıñ esas qısmı, 34 milliarddan ziyade ruble, siyrek ayvanlar ve quşlarnıñ yaşağan müitiniñ yoq etilgeni içün berildi. Daa 93 milliondan ziyade ruble ayvanat dünyasınıñ ölümi içün, 3 milliondan ziyade ruble ise topraq kirlengeni içün ödenecek.
Evel mahkeme gemilerniñ saiplerini 49,5 milliard (27,5 milliard ğrn) ve 35,4 milliard ruble (19,6 milliard ğrn) ödemege mecbur etken edi. Aynı zamanda Rosprirodnadzor umumen tahminen 85 milliard ruble (47,2 milliard ğrn) tazminat talap ete. Rusiye naqliyat nezaretiniñ malümatına köre, mahkeme qararında köstergilenine köre, tankerlerden biri gemicilik qaidelerini bozıp ve kerekli tehnik tekşerüvsiz çalışqan. Em de gemide eñ az kerek olğan 11 hadim yerine sadece eki ekipaj azası bulundı.
Hatırlatamız ki, «Volgoneft» tankerleriniñ qazasından bir buçuq seneden ziyade keçken soñ Keriç boğazındaki mazut kirlenmesi meselesi şimdi de çezilmegen olıp qala. «Qırım Reintegratsiya Assotsiatsiyası»nıñ malümatına köre, Şçolkino yanında kirlengen topraqnı saqlav meydançığınıñ özü ekinci dereceli kirlenüv menbasına çevrildi.
2024 senesi ilk qış ayında Rusiye tankerleriniñ qazası neticesinde Keriç boğazında mazut töküvi Qırım ve Odesa yalılarında büyük kirlenmesiniñ sebebi oldı ve deñiz müitine tesir etti. Ukrayin alimleri ve memurları Qara deñizniñ «cenk areketleri keçken ekologik poligon»ğa çevrilgenini bildirdiler ve ekosistemağa tesirni qayd ettiler. Ukrayina Müit Nazirligi Rusiyeniñ halqara ekologik müessiselerde iştirakini blok ete ve Qara deñizdeki vaziyetniñ nezaretini devam ettire, dep bildirdiler 2025 senesi boş ayda Rusiye ekologik genotsidiniñ deñizdeki neticeleri boyunca brifingde.
2024 senesi ilk qış ayınıñ 15-nde Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında «Volgoneft 212» ve «Volgoneft 239» eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi «Volgoneft 239» tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde «Volgoneft-212» ve «Volgoneft-239» Rusiye tankerleriniñ qazası neticesinde çıqqan mazutnıñ Qara deñiz ekosisteması içün «felâketli aqibetleri» ola bilecegini bildirdi.
«Yeşil mektüp» cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı «asırnıñ eñ büyük ekologik felâketi» dep adlandırdı.
İlk qış ayınıñ 17-nde Qara deñizdeki Kavkaz limanı rayonında «Volgoneft-109» tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere «Volgoneft» tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen «Volgoneft-212» tankeriniñ kapitanı eki ayğa - kiçik aynıñ 17-ne qadar apiske alındı. «Volganeft-239» gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan «Volgoneft» tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken «Gam Express» felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
2025 senesi qara qış ayınıñ 4-nde işğal etilgen Sevastopolda (Aqyar) ilk qış ayınıñ 15-nde Keriç boğazında eki tankerniñ qazası sebebinden bölge emiyetli fevqulâde vaziyet rejimi ilân etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
