2024 senesi ilk qış ayınıñ 15-nde Keriç boğazında tankerler qazasından soñ bir yıl devamında Qara deñizde 688 yunus balığı elâk oldı.
İlk qış ayınıñ 18-nde Telegramda "Delfa" Rusiye ilmiy-ekologik merkezi bu aqqında haber etti.
Merkezniñ mütehassıslarınıñ aytqanlarına köre, suvdeki süt emicileriniñ çoqusı qazalardan soñ bir ay içinde elâk oldı. Yılnıñ umumiy miqdarı, keçken senelerge köre eñ yüksek köstergiçten çoq degil, amma oña yaqınlaşa, dep "Delfa" yazdı.
"Elbette, mazut tökülmesi neticesinde bu yunus balıqlarınıñ episi elâk olamay. Diger antropogen sebepler de bar — balıqçılıq ve ağlarda tesadüfiy tutuluv, deñizniñ sanayı, ziraat ve kanalizatsiyanen kirlenüvi neticesinde peyda olğan delfin hastalıqları, tabiiy ölüm de bar. Amma, bizim statistikamızğa köre, felâketten soñ birinci ayda ölümlerniñ büyük artmasını, balinalarnıñ çıqışı mevsiminde ölümlerniñ beklenilgen sayısınıñ artmasını, em de orta küz ayınıñ soñunda ve boş ayda sayısınıñ artmasını kördik", — dep bildirildi.
"Delfa"nıñ bildirgenine köre, neft tökülmesiniñ balina populâtsiyasına tesiri daa belli degil.
"Keçirilgen aqibetler bir qaç yıl devamında duyula bile: çeşit hastalıqlarnıñ artması, epizootiya patlavları, vucutta toksinlerniñ birikmesi neticesinde doğuv seviyesi tüşmesi", — dep merkez yazdı.
Hatırlatamız ki, 2025 senesi çiçek ayında merkezniñ bildirgenine köre, qara qış-çiçek ayları arasında 110 ölü yunus balığı tapıldı.
Daa evel sahte malümatqa qarşılıq merkezi bildirdi ki, Rusiye Qara deñizde "Volgoneft" tankerleriniñ qazası neticesinde yüz bergen ekologik felâketniñ aqibetlerini körmemezlikke ura. Rusiye Federatsiyasınıñ Krasnodar ülkesinde Anapa plâjlarında, boğazda bozulğan tankerlerden mazut lekeleri qayd etile.
Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında "Volgoneft 212" ve "Volgoneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volgoneft-212" ve "Volgoneft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volgoneft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
2025 senesi qara qış ayınıñ 4-nde işğal etilgen Sevastopolda (Aqyar) ilk qış ayınıñ 15-nde Keriç boğazında eki tankerniñ qazası sebebinden bölge emiyetli fevqulâde vaziyet rejimi ilân etildi.
Telegram, WhatsApp, Facebook, TikTok ve YouTubede Suspilne Qırım haberlerine abne oluñız
