İşğal etilgen Qırımda bu yılnıñ başından berli yüzden çoq yunus balığı elâk oldı. Olarnı yalıda taptılar. Aynı vaqıtta kiçik aynıñ başında Keriç boğazında olğan mazut tökülgeni sebebinden eñ az seksen yunus balığı ölü tapıldı.
"Raat deñiz" Rusiye merkezi bunı bildirdi.
"Bu seneniñ qara qış ayından çiçek ayına qadar Qırım yarımadasınıñ yalısında 110 ölü yunus balığı qayd etildi", — dep aytıla haberde.
Yunus balıqlarınıñ ne sebepten elâk olğanları ve ne yerde tapılğanları belli degil. Aynı zamanda Keriç boğazında Rusiye tankerlerinden mazut tökülgen soñ eñ az 84 yunus balığı elâk oldı.
Hatırlatamız ki, işğalciler Keriç boğazında yüz bergen qaza aqibetlerini yoq etip olamadılar. "Volgoneft" tankerleri batqan üç ay keçken soñ, Azaq deñiziniñ yalısı alâ daa mazutnen kirlenilgen.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
