Keriç boğazında, Azaq deñizinde ve Qara deñiz yalısında çalışqan 1 300 Rusiye gemisinden 200-den ziyadesi yaramay.
"Rossiya 24" telekanalınıñ efirinde Rusiye Federatsiya Şurasınıñ iqtisadiy siyaset komitetiniñ reis muavini Oleksandr Trembitskıy bu aqqında bildirdi.
"Bundan soñ zenaatdaşlarım bir yerde bozuvlarnı yoq eteler, bir yerde ise iqtisadiy faaliyetten çıqalar, gemilerniñ malümatları deñizlerimizge kirsetilmey", — dep o qayd etti.
Senatornıñ aytqanına köre, 2024 senesi ilk qış ayında Keriç boğazında batqan eki Rusiye tankeriniñ qazası neticesinde Rusiyeniñ Krasnodar ülkesiniñ yalısına ketirilgen cermay mahsulatınıñ ekologik zararı 105 million ruble (31,5 million ğrıvnâ) teşkil ete.
Hatırlatamız, 2024 senesi ilk qış ayında Keriç boğazında Rusiye tankerleriniñ qazası neticesinde yağ tökülmesi işğal etilgen Qırım ve Odesa yalı boyunıñ büyük miqyaslı kirlenmesine sebep oldı, deñiz faunasına da tesir etti.
Ukrayina alimleri ve memurları Qara deñizniñ "arbiy areketler keçirilgen ekologik meydançıqqa" çevirilecegini bildirdi ve ekosistem içün aqibetlerini qayd etti.
Ukrayina Mudafaa nazirligi Rusiyeniñ halqara ekologik institutlarında iştirakini blok ete ve Qara deñizdeki vaziyetni uydu ve riyaziyat modelleri yardımınen nezaret etmege devam ete, dep haber etildi deñizde Rusiye ekotsıdınıñ aqibetleri aqqında brifingde.
Daa evel dezinformatsiyağa qarşılıq kösterüv merkezi, Rusiye Qara deñizde "Volgoneft" tankerleriniñ qazası neticesinde yüz bergen ekologik felâketniñ aqibetlerini körmey, dep bildirgen edi. Rusiye Federatsiyasınıñ Krasnodar ülkesinde Anapa plâjlarında, boğazda bozulğan tankerlerden yanacaq yağınıñ çıqarılması qayd etile.
Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında "Volgoneft 212" ve "Volgoneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volgoneft-212" ve "Volgoneft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volgoneft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
2025 senesi qara qış ayınıñ 4-nde işğal etilgen Sevastopolda (Aqyar) ilk qış ayınıñ 15-nde Keriç boğazında eki tankerniñ qazası sebebinden bölge emiyetli fevqulâde vaziyet rejimi ilân etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
