Qara qış ayınıñ 27-nde Halqara deñiz teşkilâtınıñ (IMO) alt eyyeti "Volgoneft" tankerleriniñ qazası sebebinden kirlenüvniñ ögüni aluv davasını baqacaq.
Ukraina Devlet ekologik inspektsiyasınıñ Suspilne Qırımğa bergeni cevabında böyle malümat qayd etildi.
"Bu adise, gemilerniñ havfsızlıq standartlarına riayet etüvi içün halqara nezaretni sertleştirmek ve kelecekte deñiz müitiniñ kirlenüvini toqtatmaq içün Rusiye Federatsiyasına basqı yapmaq kerekligini qayd ete. Tış işleri nazirligi ve Astyapı nazirliginen beraberlikte BM, UNEP, UNESCO, Avropa Birligi ve Halqara deñiz teşkilâtına muracaat azırlandı", — dep aytıla mektüpte.
Bundan da ğayrı, Devlet koinspektsıyasınıñ bölge bölükleri Herson, Mıkolayiv ve Odesa vilâyetlerinde topraqlarnıñ kirlenüviniñ ögüni aluv tedbirlerini keçire.
Hatırlatamız ki, Qırımnıñ reintegratsiya birliginiñ muracaatına cevap olaraq IMO Deñiz müit bölüginiñ müdiri Hayke Deggim tasdıqladı ki, teşkilâtnıñ kâtibiyeti "bu vaqialarnıñ ciddiyligini añlay" ve vaziyetni añlamaq içün malümat toplay.
"İMO bu vaqialarnıñ ciddiyligini ve etraftaki müitke etkilerini tanıy ve zarar körgen er keske, şu cümleden neticede büyük meselelerge oğrağan yerli cemiyetlerge samimiy taziye bildirmege istey", — dep Hayke Deggim qayd etti.
Bundan ğayrı, Ukraina BMniñ Halqara makemesine muracaat etip, Rusiyege qarşı BMniñ deñiz uquqı boyunca konventsiyasını bozğanı içün dava açmağa niyetlene. Suspilne Qırım Ukraina etraftaki müit qoruvı ve tabiiy resurslar naziriniñ birinci muavini Olena Kramarenko ikâye etti.
İlk malümatqa köre, qazanıñ sebebi — Rusiye tarafından deñizcilik telükesizliginiñ tehnikiy talaplarına riayet etmemesi, şu cümleden furtuna şaraitinde açıq deñizde özen gemileriniñ qullanılmasıdır, — dep Devletkoinspektsiyasınıñ Suspilne Qırımğa bergen cevabında qayd etildi.
Belli olğanı kibi, tankerlerden biri 4300 tonna mazut taşıy edi.
Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında "Volgoneft 212" ve "Volgoneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volgoneft-212" ve "Volgoneft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volgoneft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
Telegram, WhatsApp ve Facebookta Suspilne Qırım haberlerine abune oluñız
