Rusiyeniñ azatlıqtan marum etüv yerlerinden Ukrayina tek 12 Qırım siyasiy mabüsini qaytarıp oldı. Bu sebepten halqara toplulıq Rusiyege qarşı basqını quvetleştirmege çağıra.
Böyle çağıruvnen Qırımtatar Resurs Merkeziniñ (QRM) idare reisi, Qırımtatar Milliy Meclisiniñ azası Eskender Bariyev çıqışta bulundı.
"Ukrayina ve halqara toplulıqnı Rusiyege qarşı basqını quvetleştirmege, işğal etilgen Qırımdaki repressiyalar ve insan aqlarınıñ bozuluvına alâqası olğan şahıslarğa qarşı şahsiy sanktsiyalar kirsetmege ve Kreml reineleriniñ azat etilmesine qol tutmağa tekrar çağıram", — dep Eskender Bariyev ayttı.
Hatırlatamız ki, tolu miqyaslı istilâ başlağanından berli 73 deñiştirüv olıp keçti, olarnıñ devamında tahminen 9048 ukrayinalı azat etildi. Qırım sakinlerine kelgende, 2022 senesine qadar 8 Qırım sakini azat etildi, ondan soñ — daa 4.
- Ğennadiy Afanasyev (SİZOda 2 yıl yattı)
- Ahtem Çiygöz (SİZOda 2 yıl 11 ay yattı)
- İlmi Umerov (ketmemesi aqqında imza altında bulunğan edi)
- Oleğ Sentsov (SİZOda 5 yıl ve 3 ay bulundı)
- Oleksandr Kolçenko (SİZOda 5 yıl ve 3 ay bulundı)
- Yevhen Panov (SİZOda 3 yıl ve 1 ay oturdı)
- Volodımır Baluh (SİZOda 2 yıl 9 ay yattı)
- Edem Bekirov (SİZOda 9 ay bulundı)
- Nariman Celâl (Rusiye apishanelerinde aman-aman 3 yıl bulundı)
- Leniye Umerova (Rusiye apishanelerinde aman-aman 2 yıl devamında bulunğan edi)
- Kostântın Davıdenko (Rusiye esirliginde 7,5 yıl keçirdi)
- Yaroslav Balıtskıy (Rusiye apishanelerinde aman-aman 2 yıl bulundı)
Diger deñiştirüvler çerçivesinde 5 arbiy hızmetçi — qırımtatar qaytarıldı: Asan İsenaciyev, Eldar Menumerov, Eldar Peña-Şemsedinov, Ruslan Kurtmallayev, Eskender Kudusov.
"Rusiye Qırım siyasiy mabüsleriniñ, hususan qırımtatarlarnıñ, deñiştirüv cedvellerine kirsetilmesinden saqına. Bu mesele eñ yüksek seviyede muzakereler vaqtında ukrayin tarafı tarafından defalarca köterildi", — dep Bariyev qayd etti.
Onıñ qayd etkenine köre, Qırım işğal etilgen soñ siyasiy taqipler sistematik oldı, siyasiy mabüslerniñ tutuv şaraiti ise insaniyetsizdir. Siyasiy mabüsler sert tutuv şaraiti, işkence, ruhiy basqı ve esas insan aqlarınıñ bozuluvına oğraylar. QRMniñ idare reisi qayd ete ki, er bir deñiştirüvde Qırım temsilcileri, hususan qırımtatarlar olmalılar. Bu, em işğal etilgen yarımadağa diqqat ayırmaq içün, em de işğal etilgen Qırımdaki insanlar devlet vatandaşlarını unutmağanını körmek içün müimdir.
"Qırım siyasiy mabüsleri deñiştirüv esnasına muntazam surette kirsetilmek kerekligini qayd etmek kerekim, çünki olarnıñ bazıları 10 yıldan ziyade apiste buluna. Olarnıñ azat etilüvi muzakere esnasınıñ prioritetlerinden biri olmaq kerek, çünki bir çoqları apishanede sağlıqlarını ğayıp ete bile", — dep mütehassıs añlattı.
Bariyev şunı da qayd ete ki, Qırımda qadın siyasiy mabüslerniñ sayısı arta, şunıñ içün muzakerelerde bu kategoriyağa ağır hastalar, esli başlı insanlar ve çoq balalı ana-babalarnen beraber prioritet berilmeli, çünki olar siyasiy mabüsler arasında eñ zayıf kategoriyadır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
