Kiçik aynıñ 5-nci künü arbiy esirlerni deñiştirüv vaqtında qırımtatar arbiy hızmetçisi, 36-ncı ayrı USQniñ deñiz piyadesi brigadası erkânında 501-nci ADPBayrı deñiz piyadesi batalyonınıñ bölüginiñ komandanı Ruslan Kurtmallaev de azat etildi.
Adamnıñ deñiştirilgeni aqqında Instagramda Cenk esirlerinen munasebet meseleleri idare ştabınıñ Merkeziy bölge merkeziniñ yolbaşçısı Yuliya Pavlük bildirdi.
Askerniñ apayı Olğa Kurtmallaeva ise, aqayınıñ esirlikten azat etilgeni aqqında "Diia" qullanımında haberniñ ekran resimini derc etti. Ve "evde" dep yazdı.
Ruslan Kurtmallaev aqqında ne bilemiz
Ruslan Kurtamalleev Qırımnıñ Canköy rayonında doğdı. 2014 senesi, 18 yaşından berli Ukrayina ordusında hızmet ete.
Arbiy hızmetçi hızmetni Ukrayinanıñ bir çoq sıcaq noqtasında keçirdi, 2022 senesi çiçek ayınıñ 4-nde ise Mariupolda esirlikke tüşti, dep Suspilne Qırımğa onıñ apayı Olğa bildirdi.
Çiçek ayınıñ 3-nde gece, daa yaralanğan qardaşları, birazdan esirlikke tüşkenler, batalyon ğayıp olğanını yazğanlar. Gece olarğa ne olğanını añlamay edik — yani 300 adamdan ibaret batalyon nasıl ğayıp oldı. Gece qorqunçlı edi. Ve saba Rusiye Telegram kanallarında bütün batalyon esir etilgenini kördik. Er kes bir barakada tura edi ve hadimler olarğa endi arbiy esirler olğanını ayta ediler", — dep Olğa qayd etti.
2022 senesiniñ küzünde qorantağa onıñ sağ olğanını haber etken dört satırlı qısqa mektüp keldi. 2023 senesiniñ küzünde Rusiye müstemlekesinden bir telefon keldi, o, sağ olğanını ve esirlikte olğanını ayttı.
Olğa Kurtmallaeva beş yıldır kanser hastalığını yeñe
Olga beş yıllıq kanser hastalığını yeñdi — dört ameliyat ve 26 kere himioterapiya aldı.
2025 senesi boş ayda Suspilne Qırım jurnalistlerine sevgiden qalğan ümütnen yaşamağa devam etkenini ayttı.
"Men yatıp, şimdi ölmege aqqım olıp-olmağanını dep tüşündim. Onı kim çıqaracaq? Ukrayinada onıñ kimsesi yoq", — dep arbiy esirniñ apayıqayd etti.
Ruslan Kurtmallayev 16 yaşında olğanda tuvğan Qırımını terk etip, Zaporijjâğa oqumağa köçti. Soñ arbiy hızmetke ketti. Kelecek apayınen Berdânskta tanış oldı.
"Men 15 yaşında edim. O endi arbiy hızmetçi edi, böyle büyük bir adam. Bir körüşüvde sevgi olğanını aytıp olamayım. Tabiiy ki, samimiylik bar edi. Amma sevgimbiraz soñ peyda oldı, onıñ maña nisbeten nasıl munasebet köstergenini körgen soñ, qayğınen. O ketkende men añladım ki: "Oh, men bir şeyni coyamam — men onı coyamam". İşte, men aşıq olğanımnı añladım ve altı aydan soñ o maña evlenmege teklif etti. 16 yaşında evge kelip anama: "Ana, men evlenecegim", dedim. O maña qoltuttı", — dep Olğa hatırladı.
2017 senesi çift evlendi. Ruslan deñiz piyade ordusında hızmet etken edi, tolu miqyaslı istilâ vaqtında onıñ batalyonı Mariupol civarını qorçalağan edi.
Hatırlatamız ki, kiçik aynızñ 5-nde prezident Zelenskıy 157 ukrayinalınıñ deñiştirilüvi aqqında bildirdi. Deñiştirilgenler arasında — Silâlı quvetlerniñ, Milliy gvardiyanıñ, Devlet sıñır hızmetiniñ askerleri, vatandaşlar. Çoqusı 2022 senesinden berli esirlikte edi.
Deñiştirüv çerçivesinde esirlikten qırımtatar Eskender Kudusov da azat etildi.
Ruslar onı qanunsız şekilde 29 yıl ve 6 ay apis cezasına mahküm etip, Donetsk vilâyetiniñ Hrestivka (Kirovske) şeerindeki 8-nci tüzetüv müstemlekesinde tuta ediler.
Telegram, WhatsApp, Facebook, TikTok ve YouTubede Suspilne Qırım habelerine abune oluñız
