Arman ayınıñ 14-nde esirlerni deñiştirüv çerçivesinde Ukrayinağa 84 ukrayinalı — 33 arbiy hızmetçi ve 51 vatandaş qayttı. Olarnıñ arasında Qırım sakini Yaroslav Balıtskıy da bar. İlk yaz ayınıñ 4-nde işğalli Qırım mahkemesi onı "devlet hainligi"nde qabaatlap, 20 yılğa apiske aldı.
Yaroslav Suspilnege şimdi hastahanede olğanını ayttı.
"Men yahşım, er şey yahşı. Bizni yahşı qarşıladılar, ihtiyacımız olğan er şeyni berdiler. Ahlâqiy, içtimaiy, vesiqalı olaraq yañıdan alamız. Bu yönelişte çalışamız. Şimdi hastahanedemiz, bir qaç kün içinde reabilitatsiya merkezine avuştırılacaqmız", — dep bildirdi o.
Balıtskıynıñ aytqanına köre, esirlikte oña duşman kibi yanaştılar, amma ukrayin esirleriniñ bir qısmına nisbeten daa yahşı davrandılar.
"Tafsilâtlarnı şimdi aytmağa istemeyim. Cenk esirleriniñ oğraşqanları zorbalıqlar daa evel olmağan edi. Vatandaş olaraq qarşılandım, Qırım pasportım olğanı içün areketlerinden vazgeçtiler. Qırım ya da başqa yañı pasportları olmağan Ukrayina vatandaşları daa çoq zarar kördiler. Amma bizler cenk esirleriniñ nasıl tutulğanını bilemiz, şunıñ içün özümiz aqqında normal şaraitte bar olğanımıznı ayttıq. Amma çoq şey oldı", — dep hatırlay o.
Daa evel Balıtskıy "maşnada tapılğan patlayıcı alet" ve "elektrik hatlarını patlatmaq planları" içün mahküm etilgen edi. Bu qabaatlavlarğa daa bir qabaatlav qoşuldı — Yevpatoriyada (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) nezaret kamerası yerleştirildi, tahqiqatnıñ versiyasına köre, oña "Rusiye polisini nezaret etmek içün UHH hadimleri qoşuldı".
Qararnı "mahkemeci" Viktor Sklârov qabul etti, oña qarşı Ukrayinada devlet hainliginde şübheli sayılıp cinaiy dava alıp barıla. Bu, Balıtskıy davasınıñ qararına tesir ete bile edi.
Hatırlatamız ki, arman ayınıñ 14-nde deñiştirüv neticesinde tolu miqyaslı istilânıñ ilk aylarında ğayıp olğan Mariupol qorçalayıcısı Oleksandr Boyçuk da Rusiye esirliginden Ukrayinağa qaytıp keldi. O, 2014 senesi Qırım işğali vaqtında Rusiye arbiy hızmetçilerine teslim olmağan "Geniçesk" gemisiniñ baş miçmanı edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
