Rusiye ve Ukrayina arasında esirlerni deñiştirüv çerçivesinde qırımtatar Eskender Kudusov azat etildi. Ruslar onı qanunsız şekilde 29 yıl ve 6 ay apis cezasına üküm etip, Donetsk vilâyetiniñ Hreştivka (Kirovske) şeerindeki 8-nci tüzetüv müstemlekesinde tutalar.
Qırımtatar Milliy Meclisiniñ reisi Refat Çubarov Facebookta bunı bildirdi.
Qırımtatar asıllı ukrayin askeri 2022 senesi çiçek ayınıñ 16-nda Rusiyeniñ esirligine tüşti, o, Mariupol içün uruşlar vaqtında gruppanen qamaçavdan çıqmağa tırışqan edi. Daa soñra ruslar oña qanunsız şekilde 29 yıl ve 6 ay apis cezasını berdiler.
Kiçik aynıñ 5-nde prezident Zelenskıy 157 ukrayinalınıñ deñiştirilüvi aqqında bildirdi. Deñiştirilgenler arasında — Silâlı quvetlerniñ, Milliy gvardiyanıñ, Devlet sıñır hızmetiniñ askerleri, vatandaşlar. Çoqusı 2022 senesinden berli esirlikte edi.
Eskender Kudusov aqqında ne bilemiz
Eskender Kudusov — 41 yaşındaki qırımtatar, ukrayin arbiy hızmetçisi, Ukrayina Silâlı quvetleriniñ baş praporşçigi. Özbekistanda sürgün etilgen qırımtatarlarnıñ qorantasında doğdı. Qırımğa qorantası 1993 senesi qaytıp oldı.
18 yaşında müddetli arbiy hızmetke kirdi, soñra orduda qaldı. İraq (2004-2005) ve Kosovoda (2009) barışıq saqlav missiyalarında iştirak etti.
2014 senesi Eskender Kudusov Feodosiyada (KefeRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adde) yerleşken deñiz piyade askerleriniñ Birinci ayrı batalyonında hızmet etken edi. O, Ukrayina antına sadıq qaldı, Rusiye tarafına keçmege red etti ve ağa-qardaşlarınen beraber Mıkolayivge tahliye etildi, anda hızmetini devam etti.
Donetsk vilâyetinde Eskender Kudusov rus ordularınıñ tolu miqyaslı istilâsını kördi. 2022 senesi çiçek ayında, Mariupol içün uruşlar vaqtında, o, dört kişiden ibaret gruppa terkibinde qamaçavdan çıqmağa tırıştı.
Rusiye tarafı Eskender Kudusovnı 25 yılğa apiske aldı, amma 2025 senesi orta küz ayında sert rejimli müstemlekedeki apis cezası 29 yıl ve 6 ayğa qadar uzatıldı. Eskenderniñ mahkeme oturışı Moskvada onıñ şahsiy iştiragi olmadan keçti, apis cezası deñiştirilmedi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
