Baar avası şarqiy Qırım plâjlarınıñ mazutnen kirlenüv meselesini kerginleştirdi. İşğal etilgen Sudaqta, hususan Kapsel körfezinde, yalıda yañı mazut lekeleri tapılmağa başladı.
Qırım.Aqiqatqa anonimlik şartınen çalışqan göñülli bu aqqında haber etti.
"Saban ayınıñ 9-nda Meganom plâjındaki ağlarımızda ciddiy mazutnen kir tapıldı. Kapsel körfeziniñ diger plâjlarında da vaziyet fenalaştı. Ne yazıq ki, ava artqanınen mazut lekeleriniñ çoqlaşqanı aqqında tahminler kerçekleşe başladı", — dedi göñülli.
Onıñ aytqanına köre, Sudaqnıñ Rusiye memuriyeti plâjlarnı mazuttan temizlegen göñülliler taqımını quvetleştirmek içün iç bir adım atmadı. Bundan da ğayrı, toplanğan çöplükni bile öz başına alıp ketmek ve ğayrıdan qullanmaq kerekler.
"Qırımnıñ yerli akimiyeti mazutnen kirlenüv mevzusını sustırmağa başladı. Bu añlaşılır ki, olar turistlerni qorquzmamaq içün Qırım plâjlarınıñ temizliginiñ körünişini yaratmağa isteyler. Amma bu adaletli bir şeymi? Fikrimizce, böyle özüni tınç tutmaq, meselenen semereli küreşmege keder ete", — dep göñülli qoştı.
Bu arada Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) da vaziyet qasevetlendire. Şeer yolbaşçısı, yañı mazut lekelerini tapmaq içün, bütün yalı boyu tekrar nezaret etmesini emir etti.
"Bu afta qurtaruv hızmetiniñ hadimleri kene de yalı boyu — Andriyivka şeerinden Qırımnıñ Cenübiy yalısına qadar teşkersinler. Çünki alâ daa bir yerde leke tapılğanı aqqında haberler kele", — dedi o.
Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında "Volgoneft 212" ve "Volgoneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volgoneft-212" ve "Volgoneft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volgoneft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
2025 senesi qara qış ayınıñ 4-nde işğal etilgen Sevastopolda (Aqyar) ilk qış ayınıñ 15-nde Keriç boğazında eki tankerniñ qazası sebebinden bölge emiyetli fevqulâde vaziyet rejimi ilân etildi.
Telegram, WhatsApp ve Facebookta Suspilne Qırım haberlerine abune oluñız
