İlk qış ayınıñ 15-nde Keriç boğazında eki Rusiye tankeriniñ qazası neticesinde eñ azından 32 yunus balığı elâk oldı.
"Delfa" Rusiye yunus balıqlarını qurtaruv ilmiy-ekologik merkezi Telegramda bunı bildirdi.
Qayd etilgenine köre, eki "Volgoneft" tankeriniñ qazasından berli 61 ölü yunus balığı qayd etildi, lâkin ekologlarnıñ malümatına köre, 29 başqa süt emici mazut sebebinden öldi.
"Cesetleriniñ vaziyetine köre, büyük ihtimalnen bu kitlerniñ çoqusı, qazadan soñ ilk 10 kün içinde elâk oldı. Ve şimdi deñiz olarnı çıqarmağa devam ete. Esasen azovlar zarar kördi, olar er vaqıt eñ zayıf olğan kitler edi", — dep merkezniñ haberinde qayd etildi.
UPD. Ayatiyat ilimleri doktorı, professor, baş ilmiy hadim Pavlo Ğoldin, Suspilne Qırımğa tefsirinde, yunus balıqlarınıñ ölüminiñ sebebiniñ belli olmağanını bildirdi, çünki olarnıñ cesetleri ögrenilmedi, lâkin bunı mazut tökülmesine bağlamaq içün sebepler bar olğanını ayttı.
"Başqa iç bir şey belli degil. Bu mevsim içün cesetler sayısı pek yüksek, ağ izleriniñ olmaması acayiptir. Amma olar (muar. — yunus balıqlarını qurtaruv merkeziniñ hadimleri) qıdırılğan yer ve menbalarnı aytmaylar. Soçiden ve yerli sakinlerden alınğan malümatqa baqsaq, bu farqlı bir şey. Amma birisiniñ atılması — bu da acayip bir şey. Bu hastalıq ya da tesaduf ola bilir. Tahmin etmek manası yoq, teşkerüv ve analizler yapmaq kerek. Tibbit teşkerüv yapmadan sebep belli olmağan bir şey qalır", — dep qayd etti Ğoldin.
UPD_1. Bundan da ğayrı, Biloğirsk civarındaki "Taygan" safari parkına Yevpatoriyadan (KezlevRusiye imperiyası ve Soviet Birligi tarafından Qırımnıñ meskün yerleriniñ adlarını deñiştirüv islâatından evelki ad) mazut hastalığına oğrağan quşlar ketirilgeni belli oldı. Park müdiri Oleğ Zubkov bunı bildirdi, dep haber etti "Qırım 24".
"Biz, kelgen quşlarnıñ sayısı bu qadar artacağını beklemedik. Bizler, kirlilik tek Keriç ve onıñ civarındaki suv alanlarına tesir etecek, dep tüşündik, amma bugün biz Yevpatoriyadan (Kezlevden) birinci quşlarnı aldıq. Quşlar çoq, soñuna qadar körünmey", — dedi o.
Hatırlatamız ki, qara qış ayınıñ 4-nde Sevastopolda (AqyardaRusiye imperiyası ve Soviet Birligi tarafından Qırımnıñ meskün yerleriniñ adlarını deñiştirüv islâatından evelki ad), ilk qış ayınıñ 15-nde Keriç boğazında eki tankerniñ qazası sebebinden bölge emiyetli fevqulâde vaziyet rejimi ilân etildi. Bundan evel Sevastopol "gubernatorı" Mihail Razvojayev, mazut Sevastopol yalılarına yetkenini bildirdi. Balıqlava körfezinde, hususan, bir neft lekesi tapıldı.
Qara qış ayınıñ 2-nde Qırım yalısında, ilk qış ayınıñ 15-nde Keriç boğazında "Volganeft" Rusiye tankerlerinen yüz bergen qazadan soñ, neft mahsulatınen kirlenilgen daa eki yer tapıldı. Aynı künü Rusiye FVN kirlengen yerlerni temizletkenini bildirdi.
Rusiye de, suvda batqan tankerlerde bozulğan konteynerlerniñ sayısını belgiledi ve dünyada "böyle "ağır" mazutnı suv qalınlığından çıqarmaq içün "sınalğan tehnologiyalar yoq", dep bildirdi "Deñiz qurtaruv hızmeti" federal devlet bücet müessisesi.
Ukrain deñiz ekologiyası ilmiy merkeziniñ müdiriniñ muavini Viktor Komorinniñ Suspilne Qırımğa bildirgenine köre, Keriç boğazında yüz bergen qaza sebebinden ekologiya içün eñ problemli aqibetler — bu, Qara deñiz akvatoriyasında balıq, yunus balıq ve quşlarğa mazutnıñ ketirilmesi neticesinde keskin intoksikatsiyadır.
Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında "Volagneft 212" ve "Volagneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volganeft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volganeft-212" ve "Volganeft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volganeft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
Telegram, WhatsApp ve Facebookta Suspilne Qırım haberlerine abune oluñız
