Herson vilâyetiniñ işğalli memuriyeti Herson vilâyetiniñ bala eviniñ 42 talebesini işğal etilgen Qırımda "vasiy aileleri"ne bergenini bildirdi. 2022 senesi ruslar o bala evinden 47 balanı Qırımnıñ "Yoloçka" mahsus bala evine qanunsız şekilde alıp kettiler.
Qara qış ayınıñ 12-nde Herson vilâyetiniñ işğalli senatorı Konstantin Basük Telegram kanalında bunı bildirdi.
"Bugün 42 bala Qırım sakinleriniñ qorantalarına yerleştirildi. "Yoloçka"da beş Herson balaçığı qaldı", — dep o bildirdi.
2024 senesi The New York Times jurnalistleri Putinniñ firqasınen bağlı memurlar ve siyasetçilerniñ bütün ağı Herson bala evinden balalarnıñ avuştırılmasını teşkil etkenini közettiler.
Mahsus imkânları olğan balalarnı atışlar altında alıp kettiler, soñra ise ruslar olarnı işğal etilgen Qırımğa alıp kettiler, esnasnı teşviqat levhalarınen kösterdiler. Balalarğa Rusiye vatandaşlığı berildi, bu ise Rusiye Federatsiyasında evlâtlıqqa aluvğa yol açtı.
Mütehassıslar bunı The New York Times tefsirinde cenk cinayeti ve balalarnı ukrayin kimliginden marum etmek ıntıluvı dep adlandırdılar. Bir qısmı qaytarıldı, amma çoqusı alâ daa Rusiye nezareti altında qala.
Hatırlatamız ki, Rusiye eñ az 20 biñ ukrayin balasını zorbalıqnen sürgün etti, olarnıñ bir qısmı işğal etilgen Qırımda yañıdan terbiye etüv lagerlerine tüşti. Anda olarnı Rusiye Federatsiyasınıñ gimnini aytmağa mecbur eteler, silâ qullanmağa ögreteler ve Rusiye vatandaşlığını qabul ettireler. Balalarnı qorquzalar, teşviqatnı qabul etmegenlerni ise izolâtsiya eteler.
Suspilne Qırım jurnalistleri Rostislavnen subetleştiler. 2022 senesi yazda, 16 yaşında olğanda, ruslar onı Herson vilâyetiniñ tuvğan Radensk köyünden işğal etilgen Qırımğa zornen alıp kettiler. İşğalciler onıñ anasını da alıp kettiler. Oğlançıqnıñ hatıralarına köre, lagerde balalar sert qaidelerge uyğan ediler.
İnsan aqları bölge merkezi, 2023 senesiniñ soñunda — 2024 senesiniñ başında keçirilgen tedqiqat çerçivesinde, 85 rus qabul etici ana-babalarını qayd etti, olarnıñ yanında tahminen 150 ukrayin balası bar. 2025 senesi saban ayına qadar ukrayin balaları Rusiye qorantalarında qalalar.
Merkezniñ adliyecisi Katerına Raşevskanıñ Suspilnege bildirgenine köre, balalarnıñ aman-aman 13%-i arbiy hızmetçiler olğan qorantalarda qaldı. Bu, ukrayin balaları kirgen eñ büyük ekinci zenaat gruppasıdır. Birinci gruppağa tasil temsilcileri kire, dep uquq qorçalayıcı ayttı.
2025 senesi kiçik ayda Save Ukraine hayriye teşkilâtınıñ esasçısı ve yolbaşçısı Mıkola Kuleba bildirdi ki, işğalciler Herson vilâyetinde 42 ukrayin balasını rus qorantalarına bergenleri aqqında malümatnı tasdıqladılar. Olarnı qanunsız sürette Qırımdaki "Yoloçka" bala evine avuştırdılar. O vaqıt anda merkeziy siñir sisteması bozulğan 10 çağına yetmegen bala bar edi.
Rusiyeniñ ukrayin balalarını hırsızlağanı aqqında ne bilemiz
Prezidentniñ bala aqları vekâletlisi Darya Ğerasımçuknıñ bildirgenine köre, saban ayınıñ soñunda ukrayin akimiyetine Rusiyeniñ işğal etilgen toprağından çıqarılğan 19,5 biñden ziyade bala aqqında belli edi, amma olarnı saymaq qıyın, çünki Ukrayina toprağınıñ bir qısmı işğal etilgen.
Çiçek ayında Milliy muqavemet merkeziniñ malümatına köre, vaqtınca işğal etilgen Ukrayina topraqlarında rusiyeliler, balalarnı sürgün etmek maqsadınen sebebini tapmaq içün, bu balalarnı zorbalıqnen "tibbiy baqıluvı"na alıp baralar. Bu yılnıñ başından berli Ukrayina şarqından 103 biñge yaqın çağına yetmegen ukrayinalı qanunsız sürgün etildi.
Çiçek ayınıñ 5-nde dünyanıñ 49 memleketi umumiy beyanatta Rusiyeni, vaqtınca işğal etilgen topraqlardan ukrayin balalarını alıp qaçuvnıñ qanuniy sebeplerine dair Havfsızlıq şurasınıñ toplaşuvını teşkil etkeni içün taqbih etti, dep bu memleketlerniñ umumiy beyanatında qayd etildi. Büyük Britaniya Rusiye bala aqları vekâletlisi Lvova-Belovanıñ Birleşken Milletler Teşkilâtındaki çıqışınıñ yayınlanmasını blok etip, onı areketleri içün Gaagada mesüliyetke çekmege çağırdı.
Baş prokurornıñ ofisiniñ bildirgenine köre, Rusiyege sürgün etilgen ukrayin balalarını qaytarmağa imkân bergen yekâne şeffaf algoritm ya da mehanizm şimdilik yoq.
Saban ayınıñ 17-nde Halqara Cinaiy Mahkeme Putin ve Lvova-Belovağa tevqif qararı çıqardı. Olarnı ukrayin balalarını qanunsız sürgün etüv ve köçürüvde qabaatlaylar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
