Herson vilâyetinde işğalciler 42 ukrain balasını Rusiye qorantalarına vasiylikke bergenlerini tasdıqladılar. Olarnı qanunsız olaraq Qırımdaki "Yoloçka" bala evine avuştırdılar. Anda merkeziy nerv sistemasınıñ bozulması olğan çağına yetmegen 10 hasta buluna.
Öz Telegram kanalında Save Ukraine hayriye teşkilâtınıñ tesisçisi ve yolbaşçısı Mıkola Kuleba bunı bildirdi.
Onıñ aytqanına köre, rusiye işğalcileri ukrain kimliginiñ yoq etilmesi ve zorbalıqnen ruslaştırıluvınen oğraşa.
"Vaqtınca işğal etilgen Qırımda ana-babasız qalğan bala, saylav ve qoruv aqqından marum qala. O, öz kimligini, qorantasını, memleketini tek başına qoruyamaz. Rusiye bu qoruvsızlıqnı qullanıp, olarnıñ adlarını deñiştire, Ukraina olarnı terk etti dep ayta ve bunı "yañı ayat" dep adlandıra", — dep Mıkola Kuleba tarif etti.
O şunı da qoştı ki, işğalcilerniñ areketleri — BMniñ Bala aqları şartnamesi ve Jeneva şartnamesini bozğan arbiy cinayettir.
"Çünki balalarnıñ kelecegini hırsızlamaqtan daa büyük cinayet yoq. Bu sebepten bizler, ruslar tarafından qaçırılğan er bir ukrain balası içün küreşmege devam etemiz ve Rusiye Federatsiyasınıñ balalarımızğa qarşı yapqan er bir cinayetini qayd etemiz", — dep Kuleba qayd etti.
Telegram, WhatsApp ve Facebookta Suspilne Qırım haberlerine abune oluñız
