Ukrayina Mudafaa nazirliginiñ Baş istihbarat idaresiniñ kiber mütehassısları muvafaqiyetli keçirilgen operatsiya neticesinde işğalli Qırım akimiyetiniñ bütün kompyuter ve serverlerine kene tam irişimni elde ettiler. 100 TB-den ziyade istihbarat malümatı elde etildi, şu cümleden Qırım "başı" Sergey Aksönovnıñ hızmet mektüpleri, iş vesiqaları ve Qırım "nazirlikleri" ve "hızmetleri" arasındaki yazışmalar.
Bİİden menba Suspilne Qırımğa bunı bildirdi.
Alınğan malümat arasında Donetsk, Luğansk, Herson ve Zaporijjâ vilâyetleriniñ vaqtınca işğal etilgen topraqlarından ukrayin balalarınıñ qanunsız ketirilüvi aqqında çoq vesiqa bar.
Hususan, işğalli akimiyet tarafından Qırımğa ve Rusiye toprağına çıqarılğan çağına yetmegenler cedvellerini elde etmege imkân oldı — bu balalarnıñ anketa malümatları, vasiylerniñ malümatları ve olarnıñ yaşağan/oquğan yerleri. Bu malümat Ukrayina balalarınıñ hırsızlanuvınen bağlı cenk cinayetleriniñ taqiqatı içün uquq qorçalayıcı organlarına berildi.
Bundan da ğayrı, Bİİniñ kibertehnikleri Ukrayinağa qarşı cenknen bağlı bir çoq malümatnı elde ettiler. Hususan, Rusiye arbiy hızmetçileri cedvelleri, olarnıñ şahsiy malümatları ve soy-sopları aqqında malümat, esir ve elâk olğanlar cedvelleri, "ölüm" ödemeleri aqqında qararlar, Qırımdaki topraq damartılarını ayırmaq ricasınen "SVO iştirakçileri"niñ arizaları aqqında söz kete.
İşğalli Qırım nazirlikleri arasında yazışqan bazı vesiqalar ve bir çoq toplaşuv aqqında vesiqalar, Rusiye neft zavodlarına ücümlerden soñ yaqarlıq ve yağ malzemeleri qıtlığı olğanını tasdıqlağan vesiqaşar, dep neşirniñ subetdeşi qayd etti.
Bİİniñ menbasınıñ bildirgenine köre, soñki aylar içinde işğalli Qırım akimiyetiniñ serverlerine bu endi ekinci kere muvafaqiyetli ücüm oldı. Bundan evelki operatsiyadan soñ FSB temsilcileri Aksönov ve onıñ hadimleri yanına kelip, "kör sıçaqn"nı tapmağa tırıştılar, amma becermediler.
Daa evel Ukrayina ükümetiniñ kibertehnik mütehassısları ruslar tarafından vaqtınca işğal etilgen topraqlardan biñlernen ukrayin balasınıñ alıp qaçılğanına dair yañı deliller aldılar. Bu malümat olarnı tapıp, evlerine qaytarmağa ve bu cenk cinayetinen alâqası olğanlarnı cezalandırmağa yardım etecek.
Rusiyeniñ ukrayin balalarını hırsızlavı aqqında ne bilemiz
Prezidentniñ bala aqları vekâletlisi Darya Ğerasimçuk, 2023 senesi saban ayınıñ soñunda Ukrayina akimiyeti 19,5 biñden ziyade bala VİETdan Rusiyege çıqarılğanını bile, amma işğal sebebinden olarnı saymağa qıyın olğanını bildirdi.
2023 senesi çiçek ayınıñ 5-nde dünyanıñ 49 memleketi Rusiye Federatsiyasını, vaqtınca işğal etilgen topraqlardan ukrayin balalarınıñ hırsızlanmasınıñ qanuniy sebeplerine dair Havfsızlıq şurasınıñ toplaşuvını teşkil etkeni içün, umumiy beyanatta takbih etti. Büyük Britaniya Rusiyeniñ bala aqları vekâletlisi Lvova-Belovanıñ Birleşken Milletler Teşkilâtında çıqışınıñ yayınlanmasını blok etip, onı Gaagadaki mahkemede areketleri içün cevap bermesine çağırdı.
Baş prokurornıñ ofisi qayd etti ki, şimdilik Rusiyege sürgün etilgen ukrayin balalarını qaytarmaq içün tek bir de bir açıq algoritm ya da mehanizm yoq.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
