Ukraina Mudafaa nazirliginiñ istihbaratınıñ baş idaresiniñ kiber mütehassısları, ruslar tarafından vaqtınca işğal etilgen topraqlardan biñlernen ukrain balalarını qaçırğanları aqqında yañı deliller aldılar. Bu malümat, olarnı tapıp, evlerine qaytarmağa ve bu cenk cinayetine qoşulğanlarını cezalanadırmağa imkân berecek.
Bu aqta oraq aynıñ 30 Ukraina Mudafaa nazirliginiñ İBİ Facebook-ta haber etti.
Ebet, kiber mütehassıslar Qırım işğalci ükümeti serverlerine kirişini elde ettiler. Bu resurslarda Herson, Zaporijjâ, Donetsk ve Lugansk vilâyetleriniñ VİT-dan balalarnı zornen köçürilgenini tasdıqlağan vesiqalar bar edi.
Alınğan malümat:
- biñlernen alıp çıqarılğan ukrain balalarınıñ cedvelleri,
- vasiysiz qalğan yaşına yetmegenlerniñ şahsiy hususiyetleri,
- Rusiye Federatsiyası vatandaşları arasından vasiylerniñ qanunsız tayinlenmesi aqqında vesiqalar
- Rusiye territoriyasında balalarnı köçürüv adresleri.
"Rusiye Federatsiyasınıñ eñ büyük cenk cinayetlerinden biri — ukrain balalarını qaçıruv aqqında adalet içün qıymetsiz malümatlar olğan biñlernen fayllar endi uquq qorçalav organlarına berildi. Olar talil etilecek ve cinaiy işke kirsetilecek. Alınğan malümat, qaçırılğan balalarnı tapıp, tuvğan toprağına qaytarmağa, em de bu cinayetke qoşulğanlarnı cezalamağa imkân berecek", — bildirdi İBİ-niñ vekili Andriy Yusov.
Hatırlatayıq ki, oraq aynıñ 15-te prezident Volodımır Zelenskiy, ecnebiylerniñ balalarnıñ qanunsız areketi, em de olarnı sürgün etmek ve aqsız vatanğa qaytarmaq içün tenbiyelevni belgilemek aqqında qanunnı imzaladı.
Bundan evel Ukraina Prezidentiniñ ofisiniñ başı Andriy Yermak, 1,6 millionğa yaqın ukrain balası Rusiye territoriyasında ve Rusiyeniñ nezareti astında olğan Ukrainanıñ vaqtınca işğal etilgen topraqlarında olğanını bildirdi.
Rusiye tarafından ukrain balalarınıñ qaçıruvı aqqında belli olğanı
Prezidentniñ bala aqları boyunca muavini Darya Gerasimçuk, evelden haber etkeni kibi, 2023 senesi saban aynıñ soñuna qadar Ukraina akimiyetiniñ, VİT-dan Rusiyege alıp ketirilgen 19,5 biñden ziyade balası aqqında muayyyen malümatı bar, amma işğal sebebinden olarnı doğru saymaq qıyın.
2023 senesi çeçek aynıñ 5-te dünyanıñ 49 memleketi, öz ortaq beyanatında Rusiye Federatsiyasını vaqtınca işğal etilgen topraqlardan ukrain balalarını qaçırmaq içün iddia etilgen uquqiy esaslar boyunca Havfsızlıq Şurasınıñ toplaşuvını teşkil etkeni içün qabaatladı. Büyük Britaniya, Rusiyeniñ bala aqları boyunca komissarı Lvova-Belovanıñ BMT resurslarında yapqan çıqışınıñ yayınını qapattı ve onı Gaagadaki mahkeme ögünde yapqan areketleri içün cevap bermege çağırdı.
Baş prokuraturası, şimdiki vaqıtta sürgün etilgen ukrain balalarını Rusiyege qaytarmaq imkânını bergen bir şeffaf algoritm ya da mehanizm olmağanını qayd etti.
HCM-den RF-nıñ yuqarı arbiy yolbaşçılığınıñ tevqifine orderler aqqında belli olğanı
2024 senesi saban aynıñ 5 künü Halqara cinaiy mahkemesi, Rusiyeniñ uzaq yol aviatsiyasınıñ başı Serğiy Kobılaş ve Rusiyeniñ Qara deñiz flotınıñ başı Viktor Sokolovnı apiske aluvı aqqında qarar çıqardı.
2023 senesi saban aynıñ 17-de Halqara cinaiy mahkemesi, Putin ve Rusiyeniñ yaşına yetmegenlerniñ aqları boyunca muavini Mariya Lvova-Belovanıñ apiske alınması aqqında qarar çıqardı. Olar ukrain balalarını qanunsız sürgün etmek ve başqa yerge köçürmekte şübeleneler.
Demek, eger olar Rusiye territoriyasından tışqa, Halqara cinaiy mahkemeniñ azaları olğan ve Roma nizamnamesini tasdiqlağan devletlerge çıqsalar, olarnı apiske alıp, Gaagağa avuştırmaq kerek.
Halqara cinaiy mahkemeniñ baş prokuroru Kerim Han Putin ve Lvova-Belovanıñ apiske alınması aqqında qararnıñ müddeti olmağanını qayd etti.
Telegram, WhatsApp, Facebook ve YouTube-ta Suspilne Qırım haberlerine abune oluñız
