Kütleviy haber vastaları Keriç boğazında batqan Rusiye tankerlerinden yañı mazut tökülüv aqımlarını köstereler. Bu qaza neticesinde neft mahsulatı, suvuqlıq sebebinden, suv tübünde otura, sıcaqlıq başlağanda ise yuqarığa çıqa.
Çiçek ayınıñ 3-nde 3-nde RNBO yanındaki Sahte malümatnen küreş merkezi bu aqqında haber etti.
"Mütehassıslar çiçek ayında işğal etilgen Qırım ve RFnıñ Krasnodar ülkesiniñ yalılarına yañı mazut tökülüv yerlerini tahmin eteler. Ekologlarnıñ fikirince, mazut tökülmesiniñ aqibetlerini yoq etmek içün eñ az üç yıl kerek olur, Qara deñiz yalısınıñ tam ğayrıdan tiklenmesi ise beş yıldan on yılğa qadar süre bilir", — dep aytıla haberde.
Meseleni kerçekten çezmek yerine Rusiye akimiyeti nezaret illüziyasını yaratmağa tırışa ve biñlernen balalarnı ekologik felâket zonasına "sağlıqlaştırıluv"ğa yollamağa planlaştıra, dep SMKM yazdı.
Hatırlatamız ki, Rusiyeniñ "Raat deñiz" merkeziniñ malümatına köre, işğal etilgen Qırımda 2025 senesiniñ başından berli yüzden çoq yunus balığı elâk oldı.
Milliy muqavemet merkezi saban ayınıñ 7-nde bildirdi ki, işğalciler Keriç boğazında yüz bergen qaza aqibetlerini yoq etip olamadılar. "Volgoneft" tankerleri batqan üç ay keçken soñ, Azaq deñiziniñ yalısı alâ daa mazutnen kirlenilgen.
Saban ayında Rusiye Naqliyat nazirliginiñ yolbaşçısı Roman Starovoyt, tankerler 2026 senesiniñ başında köterilecek, dep bildirdi. Saban ayınıñ başında gemilerden birisiniñ ögüni ayırıp bitirgenler.
Keriç boğazındaki qaza aqqında ne bilemiz
İlk qış aynıñ 15-nde Keriç boğazı yanında "Volgoneft 212" ve "Volgoneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volgoneft-212" ve "Volgoneft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volgoneft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
2025 senesi qara qış ayınıñ 4-nde işğal etilgen Sevastopolda (Aqyar) ilk qış ayınıñ 15-nde Keriç boğazında eki tankerniñ qazası sebebinden bölge emiyetli fevqulâde vaziyet rejimi ilân etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız