"Gratı" neşriniñ jurnalisti, Qırım uquq qorçalayıcısı ve faalcisi Lütfiye Zudiyeva Rusiye Federatsiyasınıñ Adalet nazirligine qarşı Rusiyeniñ "çetel agentleri cedveli"ne kirsetilmesi boyunca dava açtı.
O, bunı Facebookta bildirdi.
"Rusiye Adalet nazirliginiñ meni "çetel agentleri" cedveline kirsetmek içün uquqiy sebebi yoq edi, şikâyet etilgen emir ise qanunsız ve temelsizdir", — dep yazdı o.
Hatırlatamız ki, Rusiyeniñ "çetel agentleri cedveli"ne Lütfiye Zudiyevanıñ kirsetilüvi aqqında mayıs ayında belli oldı. Bundan evel o, işğalli akimiyet tarafından taqip etilgen edi.
"Yüksekten kelgen akimiyetke ve emirlerge alışqan insanlar içün bunı añlamaq qıyın, lâkin menim fikirlerim ve duyğularımnı kimse aytamaz. Etrafımdaki kerçekni körmek ve tasvirlemek içün maña iç bir "çetel küçler" ya da "çetelden tesir" kerekmey — ana-babasız ösken balalar, muntazam tintüvler ve apis etüvler, insanlarnıñ acısı ve qasevetleri. Jurnalist materiallarımnıñ, qaramanlarımnıñ ve formatlarımnıñ mevzularını özüm saylayım. Amma çoqusı allarda olarğa adiy insan destegi kerek", — dep jurnalist yazdı.
Lütfiye Zudiyeva işğal etilgen Qırımda mahkeme esnasları ve insan aqlarınıñ bozuluvını aydınlata, siyasiy mabüslerniñ taqdirini taqip ete.
Rusiyede çetel agentleri cedveli — bu, Rusiye Federatsiyası tarafından diger memleketlerniñ tesiri altında areket etken dep sayılğan şahıslar, kütleviy haber vastaları ya da teşkilâtlarnıñ cedveli. Bu şahıslar ya da teşkilâtlar qayd etilgen soñ, bütün neşirlerde "yabancı agent" statusını qayd etmek ve muntazam surette esabat bermege mecburlar.
Bu cedvelge daa evel ukrayin jurnalistleri — İrına Romaliyska, İvan Yakovına, siyasetşınas Taras Berezovets ve advokat Mıkola Polozov kirsetildi.
Lütfiye Zudiyeva aqqında ne bilemiz
Lütfiye Zudiyeva, "Qırıjm birdemligi"niñ faalcisi ve "Gratı"nıñ jurnalistidir. Qırımdaki makeme ceryanları ve insan aqları bozmalarını aydınlata. 2014 senesinden evel bala merkezini reberlik ete edi, işğalden soñ ise uquq qorçalav saasında çalışmağa başladı.
2019 senesi içtimaiy ağlarda post sebebinden Zudiyeva tutuldı. O zaman "aşırıcılıq timsaller"nen paylaşqan faalci, 2 biñ ruble cezasını ödedi.
Oraq ayınıñ 27-sinde işğal etilgen Qırım Yuqarı makemesinde video bağ vastasınen Soçi şeerindeki umumiy yurisdiktsiyalı Üçünci Apellâtsiya makemesinen berbaber "Nariman Celâl ve Ahtemov qardaşlarınıñ davası"na bianen üküm çıqarıdı. "Makeme" binası ögünde Lütfiye Zudiyeva da tutuldı. Birazdan jurnalistke 12 biñ rublelik para cezasını berdi. 2024 senesi kiçik aynıñ 12-inde RF Kasatsiya makemesi, para cezasına şikâtenamesini baqmağa aldı.
Kiçik aynıñ 22-siniñ sabasında işğal uquq qorçalayıcıları organlarınıñ işçileri, Lütfiye Zudiyevanıñ evini tinttiler. Bundan soñ faalcini böyle degen Aşırıcılıqqa qarşı merkezine kettiler. 3 saat anda buluna edi. "Kütleviy malümat azatlığı suisitmalı" sebebinden oña qarşı memuriy protokollar tizildi.
Saban ayında Aqmescitteki işğali Kiyev rayon makemesi uquq qorçalayıcığa Rusiye Federatsiyası Memuriy cinayetler qanunnamesiniñ 13.15 maddesiniñ 2.1 qısmına ("Kütleviy haber serbestligini qullanuvı") binaen 2 500 rublelik (1 059 grivna) para cezasını berdi.
Mayıs ayında İçki işler nazirliginiñ "Canköy" işğalli bölüginiñ vekili Zudiyevağa mitinglerniñ keçirilmesi yasaq olğanı aqqında tenbiname berdi.
Bozarğan ayda Kıyiv rayon makemesi, qırımtatar jurnalisti Lütfiye Zudiyevağa dair barışıq makemecisiniñ qararına apellâtsiya şikâyetnamesini baqtı ve "kütleviy haber azatlığınıñ suistimalı" sebebinden jurnalistni memuriy mesüliyetke çekmege qararını deñiştirmedi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
