2024 senesi bozarğan aynıñ 4. künü "Kıyiv rayon makemesi", qırımtatar jurnalisti Lütfiye Zudiyevağa dair barışıq makemecisiniñ qararına apellâtsiya şikâyetnamesini baqtı ve "kütleviy haber azatlığınıñ suistimalı" sebebinden jurnalistni memuriy mesüliuyetke çekmege qararını deñiştirmedi.
Emil Kurbedinov "Qırım birdemligi"ne bu aqqında haber berdi.
"Beklenilir ki, apellâtsiya makemesi rolünde Kıyiv rayon makemesi, barışıq makemecisiniñ qararını deñiştirmedi. Fikirimizge köre bu, tamamınen qanunsız ve sebepsizdir, biz kassatsiya makemesine şikâyetname yollaycaqmız ", — uquq qorçalayıcı añlattı.
O tüşüne ki, işğalli makemeler qanunlarğa esaslamaylar, bütün "adalet" ceryanında ise insanlarğa öz fikirlerini bildirmege izin bermeyler.
"Añlaşılır ki, uquq qorçalayıcı organlar ve olarğa yardım etken makemeler rolünde devletniñ maqsadı - böyle büyük siyasiy makeme oturışlarınen bağlı malümat halqqa bildirmemektir. İnsanlarnı susturalar ve eñ adiy şeyler aqqında laf etmemege mecbur eteler", — eminliknen Kurbedinov ayttı.
Lütfiye Zudiyeva aqqında ne bilemiz
Lütfiye Zudiyeva, "Qırıjm birdemligi"niñ faalcisi ve "Gratı"nıñ jurnalistidir. Qırımdaki makeme ceryanları ve insan aqları bozmalarını aydınlata. 2014 senesinden evel bala merkezini reberlik ete edi, işğalden soñ ise uquq qorçalav saasında çalışmağa başladı.
2019 senesi içtimaiy ağlarda post sebebinden Zudiyeva tutuldı. O zaman "aşırıcılıq timsaller"nen paylaşqan faalci, 2 biñ ruble cezasını ödedi.
Oraq ayınıñ 27-sinde işğal etilgen Qırım Yuqarı makemesinde video bağ vastasınen Soçi şeerindeki umumiy yurisdiktsiyalı Üçünci Apellâtsiya makemesinen berbaber "Nariman Celâl ve Ahtemov qardaşlarınıñ davası"na bianen üküm çıqarıdı. "Makeme" binası ögünde Lütfiye Zudiyeva da tutuldı. Birazdan jurnalistke 12 biñ rublelik para cezasını berdi. 2024 senesi kiçik aynıñ 12-inde RF Kasatsiya makemesi, para cezasına şikâtenamesini baqmağa aldı.
Kiçik aynıñ 22-siniñ sabasında işğal uquq qorçalayıcıları organlarınıñ işçileri, Lütfiye Zudiyevanıñ evini tinttiler. Bundan soñ faalcini böyle degen Aşırıcılıqqa qarşı merkezine kettiler. 3 saat anda buluna edi. "Kütleviy malümat azatlığı suisitmalı" sebebinden oña qarşı memuriy protokollar tizildi.
Telegram ve Facebookta Suspilne Qırım haberlerine abune oluñız
