Odesa vilâyetindeki "Tuzla limanları" milliy tabiat parkında mazutnen kirlenilgen quşlar tapıldı.
Öz Facebook saifesinde qara qış ayınıñ 10-nda ayatiyat ilimleri doktorı ve "Tuzla limanları" milliy parkınıñ ilmiy-tedqiqat bölüginiñ yolbaşçısı İvan Rusev bunı bildirdi.
Qayd etilgenine köre, bu, qanatlarını tez sallayıp, uzaq mesafelerge uça bilgen büyük pirnikozaPirnikozalar ailesine ait suv quşlarınıñ çeşiti. ola.
"Büyük baklannı da közettik, o, pirnikoza kibi alda edi, amma onı suvdan çıqarmaq imkânsız edi", — dep qayd etti Rusev.
O şunı da bildirdi ki, 2024 senesi ilk qış ayınıñ 15-nde Keriç boğazında Rusiye tankerleriniñ qaza neticesinde Qara deñizge tüşken neft mahsulatınıñ barlığı ve olarnıñ keyfiyetinen bağlı ola bilecek laboratoriya tetqiqatlarını keçirmek içün sağ qalmağan quş Ukrain deñiz ekologiyası merkezine yollanılacaq.
"Qaza neticesinde on biñlernen quş elâk oldı, ve bu, tabiat içün deşetli aqibetlerniñ soñu degil. Er kün ölü balinalar, esasen azovkalar tapıla, ve olarnıñ sayısı yüzge yaqın. Bilgenimiz kibi, böyle neft mahsulatınen bağlı qazalarda, deñiz ya da okean, bütün elâk olğanlarnıñ tek 5%-i çıqarıla ve bu sebepten bu qaza neticesinde elâk olğanlarnıñ sayısı biñlernen ola", — dep qayd etti Rusev.
Bundan evel Etraftaki müit nazirligi bildirdi ki, Odesa vilâyetiniñ yalısı mazutnen kirlenüv telükesi tışında buluna, şu anda onıñ kirlenüviniñ şartları yoq. Aynı zamanda, Suspilne Qırımğa tefsirinde "Yeşil yapraq" teşkilâtınıñ reisi ve ayatiyatçı Vladıslav Balinskıy, "Volgoneft" tankerleriniñ qazası neticesinde çıqqan neft mahsulatı Odesa vilâyetiniñ yalısına qara qış ayınıñ ortasına qadar kele bile, dep tahmin etti.
Keriç boğazı yanındaki neft mahsulatları tökülgeni sebebinden Ukraina halqara makeme müessiselerine, hususan BMniñ Halqara makemesine, Rusiyege qarşı BMniñ deñiz uquqı boyunca konventsiyasınıñ bozuluvı içün muracaat etmege planlaştıra.
İlk qış aynıñ 15-nde Keriç boğazı yanında "Volgoneft 212" ve "Volgoneft 239" eki rusiye gemisi batmağa başlağan. Bir geminiñ kenarında ekipajnıñ 13 azası bulunğan edi, başqasınıñ kenarında ise – 14.
Evelden, vaqia sebebi furtuna ya da yaramay avası içün tankerlerniñ bozuluvı olğan. İlk qış aynıñ 15-ine qadar işğal etilgen Qırımda şiddetli yel sebebinden furtuna ihtarını bildirdiler.
Qaza neticesinde ekipajnıñ bir azası elâk olğan. Başqaları artqaç suvumasınen hastahanege yatqızdırılğanlar.
Eki rusiye tankeriniñ qazası, mazutnıñ 4 biñden ziyade tonnasınıñ tokülüvine alıp ketirgen. Greenpeace iddia etkeni kibi, o, ekologiya içün ciddiy aqibetlerini peyda ettirebile.
Qaradeñiz strategik tedqiqatlar institutınıñ reberi Andriy Klımenko qayd etkeni kibi, gemiler deñizge çıqmağa azır degiller, çünki özen soylarından, em de eski olalar – 1951 ve 1955 çıqış yılları.
Ukraina Arbiy-deñiz quvetleriniñ spikeri Dmıtro Pletentçuk bildirdi ki, bu eki tanker, kerçekten arbiy sınıf gemileri, deñizge gemilerniñ areket qaidelerine riayet etmeden çıqtı.
İlk qış ayınıñ 16-nda Rusiye Fevqulâde vaziyetler nazirligi "Volgoneft 239" tankeriniñ erkânı tahliye etilgenini bildirdi.
Etraftaki müit nazirligi, ilk qış ayınıñ 15-nde "Volgoneft-212" ve "Volgoneft-239" Rusiye tankerleriniñ qazası neticesinde çıqqan mazutnıñ Qara deñiz ekosisteması içün "felâketli aqibetleri" ola bilecegini bildirdi.
"Yeşil mektüp" cemaat teşkilâtınıñ yolbaşçısı, biolog Vladıslav Balinskıy Suspilne Qırımğa izaat bergende bu qazanı "asırnıñ eñ büyük ekologik felâketi" dep adlandırdı.
İlk qış ayınıñ 17-nde Qara deñizdeki Kavkaz limanı rayonında "Volgoneft-109" tankeriniñ kapitanı yük tanklarından biriniñ sızıqsızlığı sebebinden felâket signalını berdi. Bu endi üçünci kere "Volgoneft" tankerleriniñ mazut taşımasıdır.
İlk qış ayınıñ 19-nda ekipaj azasınıñ ölümine ketirgen "Volgoneft-212" tankeriniñ kapitanı eki ayğa - kiçik aynıñ 17-ne qadar apiske alındı. "Volganeft-239" gemisiniñ kapitanı ise ev apsinde tutıldı.
İlk qış ayınıñ 20-nde Greenpeace, Anapadan Qırım köprüne qadar 65 km2 suv, batqan "Volgoneft" tankerlerinden birisinden aqqan mazutnen kirlengenini bildirdi. Etraftaki müit qorçalayıcıları felâketniñ miqyası daa büyük ola bilecegini tenbileyler.
İlk qış ayınıñ 20-nde Keriç boğazında Gvineya-Bisaunıñ gemisi astında yaldap ketken "Gam Express" felâket signalını berip, yardım içün muracaat etti.
İlk qış ayınıñ 21-nde Keriçniñ işğalli akimiyeti şeer plâjlarında mazut tapılğanı içün belediye fevqulâde vaziyetini ilân etti.
2025 senesi qara qış ayınıñ 4-nde işğal etilgen Sevastopolda (Aqyar) ilk qış ayınıñ 15-nde Keriç boğazında eki tankerniñ qazası sebebinden bölge emiyetli fevqulâde vaziyet rejimi ilân etildi.
Telegram, WhatsApp ve Facebookta Suspilne Qırım haberlerine abune oluñız