AQŞ, Rusiye tarafından sürgün etilgen ya da mecburen köçürilgen Ukrayinanıñ vaqtınca işğal etilgen topraqlarından (VİET) ukrayin balalarını qıdırmaq, qaytarmaq ve ğayrıdan integratsiya etmek içün 25 million dollarlıq programmanı başlata. Programmanıñ birinci basamağı içün, yani 12 million dollarnı, VİET ve Rusiye Federatsiyasından qaytqan balalarnıñ reintegratsiyasına sarf etecek teşkilât endi belgilendi.
İlk küz ayınıñ 24-nde Birleşken Milletler Teşkilâtınıñ Baş Assambleyasınıñ toplaşuvında AQŞ Devlet departamentiniñ vekilleri bunı bildirdiler.
«Ukrayina balaları ve gençleriniñ qaytarıluvı, reabilitatsiyası ve tolu reintegratsiyasına qol tutqanı içün AQŞa minnetdarmız. Bugün bu iş içün ilân etilgen 12 million dollarlıq programma, em de olarnıñ teşkerüvi ve qaytarıluvı içün 15 million dollarlıq kelecek programması, bizim koordinatsiya ğayretlerimizni desteklemege ve tolu mesuliyetlikni temin etmege yardım etecek», — dedi Ukrayina tış işler naziri Andriy Sıbiğa.
«Bring Kids Back UA» teşebbüsiniñ reberi Maksım Maksımov qayd etti ki, programmanıñ muvafaqiyetli ömürge keçirilmesi bütün iştirak etken taraflar arasında koordinatsiyanı talap ete, Devlet departamenti ve AQŞ Kongressinen çoq yıllıq işbirligi neticesinde mümkün oldı.
Ukrayina Tış işler naziriniñ muavini Dmıtro Senik de bildirdi ki, Amerika yardımı balalarnıñ bulunğan yerini belgilemege, evlerine qaytarılmasına, qoranta ve cemiyetke telükesiz reintegratsiya etilmesi içün kerekli destekniñ temin etilmesine yardım etecek.
Rusiyeniñ ukrayin balalarını hırsızlağanı aqqında ne bilemiz
Prezidentniñ bala aqları vekâletlisi Darya Ğerasımçuk, 2023 senesi saban ayınıñ soñunda Ukrayina akimiyeti vaqtınca işğal etilgen topraqlardan Rusiyege çıqarılğan 19,5 biñden ziyade bala aqqında bilgenini bildirgen edi. İşğal şaraitleri sebebinden olarnı saymaq qıyın.
Baş prokurornıñ ofisi qayd etti ki, Rusiyege sürgün etilgen ukrayin balalarını qaytarmaq içün yekâne bir de bir açıq algoritm ya da mehanizm şimdilik yoq.
2023 senesi saban ayınıñ 17-nde HCMHalqara Cinaiy mahkeme Putin ve Lvova-Belovağa tevqif qararını çıqardı. Olarnı ukrayin balalarını qanunsız şekilde sürgün etüv ve köçürüvde qabaatlaylar.
Prezident Volodımır Zelenskıy bildirdi ki, 2026 senesi ilk küz ayına qadar Bring Kids Back UA teşebbüsi sayesinde 1625 ukrayin balasını qaytarıp oldılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
