Rusiye tarafından işğalli Qırım yolbaşçısı Sergey Aksönovnı "öldürmege tırışqanı"nda qabaatlanğan Volodımır Ananyevniñ apis müddeti 2026 senesi kiçik aynıñ 5-ne qadar uzatıldı.
Cenübiy bölgeniñ arbiy mahkemesiniñ mahkemecisi Denis Galkin böyle qarar aldı, dep Qırım uquq qorçalayıcı gruppası bildirdi.
Hatırlatamız ki, ilk yaz ayında Ananyevniñ apis müddeti 2025 senesi boş ayğa qadar uzatıldı. Bundan evel Ananyevniñ davasında prokuror deñiştirildi. İlk yaz ayınıñ 23-nde işğalli Qırım yolbaşçısı Sergey Aksönovnı öldürmege tırışuv davasınıñ ekinci mabüsi olğan Volodımır Bondar 13 yılğa mahküm etildi.
Rostov-na-Donu tahqiqat izolâtorında ağır tutuv şaraiti 75 yaşındaki Qırımnıñ eñ qart siyasiy mabüsiniñ ayatı ve sağlığını telükege oğrattı. 75 yaşındaki cemaat erbabınıñ ciddiy sağlıq meseleleri bar: ayaqları ağıra, o tayanç ile areket ete, ameliyat yapılğan közleri sebebinden pek yahşı körip olamay, olardan birisi glaukoma hastalığına oğrağan, em de qan basımı yüksek. Oña daima tibbiy nezaret ve mahsus aşayt kerek, amma tahqiqat tevqifhanesinde bu ihtiyaclar közge alına. Uyğun olmağan şarait onıñ sağlığını tek boza.
Sergey Aksönovnı "öldürmege tırışuv" davası aqqında ne bilemiz
2025 senesi kiçik ayda Rusiye işğalcileri Sergey Aksönovğa qarşı suiqast azırlağanında qabaatlanğan Volodımır Ananyev, Volodımır Bodnar ve Oksana Şevçenkonı mahkemege berdi. İşğalli Qırım prokurorlığı dedi ki, ukrainler öz başına yapılğan patlayıcı alet yardımınen duşmannen işdeşlik yapqan Qırım sakininiñ maşinasını patlatmağa planlaştıra ediler.
Rusiye quvetçileriniñ malümatına köre, Bodnar Zaporijjâ vilâyetinden Qırımğa, Şevçenko kiralağan Simferopoldaki (Aqmescitteki) garaj qutusında saqlanğan patlayıcı aletni ketirdi. Qayd etilgenine köre, Aksönovnıñ marşrutını video nezareti kamerası vastasınen közetkenler.
2024 senesi kiçik ayda üçü de işğal etilgen Qırımda Rusiye FSBsiniñ hadimleri tarafından tutuldı. Olarğa qarşı "terroristik areketlerniñ azırlanuvı" ve "patlayıcı aletlerniñ qanunsız saqlanuvı" boyunca cinaiy davalar açıldı. Daa evel, saban ayınıñ 31-nde, Volodımır Bodnar da bu işte qabaatını tanıdı. Saban ayınıñ 3-nde mahkeme 75 yaşındaki Volodımır Ananyevniñ davasını baqtı.
Suspilne Qırım Volodımır Ananiyevniñ apayı, uquq qorçalayıcılar ve tanışlarınen subetleşip, Qırımnıñ eñ qart siyasiy mabüsiniñ "davası" aqqında tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
