İşğalli Qırım yolbaşçısı Serğiy Aksönovğa qarşı yapılğan suiqast davasınıñ ekinci mabüsi Volodımır Bondar 13 yıl apis cezasına mahküm etildi.
RİA ''Novosti Krım'' bunı bildirdi.
"Volodımır Bondar ilk üç yılını apishanede, qalğanını — sert rejimli müstemlekede keçirecek. Bundan da ğayrı, 500 biñ rublelik para cezasını ödemeli", — dep aytıla haberde.
Hatırlatamız ki, mayıs ayında Rusiye mahkemesi daa bir mabüsni — Oksana Şevçenkonı 10 yılğa mahküm etti, onı Rusiye vaqtınca işğal etilgen Qırımnıñ Rusiye "başı" Serğiy Aksönovğa ücüm etkeninde qabaatladı. İşğalciler onıñ qabaatını tanığanını iddia ete ediler.
İlk yaz ayınıñ 8-nde "Serğiy Aksönovğa ücüm azırlağanı"nda qabaatlanğan Volodımır Ananyevniñ davasında prokuror deñiştirildi. İlk yaz ayınıñ 3-nde olğan nevbetteki mahkeme oturışında qabaatlanğan adam sorğuğa çekildi ve qabaatsız olğanını bildirdi.
Sergey Aksönovnı "öldürmege tırışuv" davası aqqında ne bilemiz
2025 senesi kiçik ayda Rusiye işğalcileri Sergey Aksönovğa qarşı suiqast azırlağanında qabaatlanğan Volodımır Ananyev, Volodımır Bodnar ve Oksana Şevçenkonı mahkemege berdi. İşğalli Qırım prokurorlığı dedi ki, ukrainler öz başına yapılğan patlayıcı alet yardımınen duşmannen işdeşlik yapqan Qırım sakininiñ maşinasını patlatmağa planlaştıra ediler.
Rusiye quvetçileriniñ malümatına köre, Bodnar Zaporijjâ vilâyetinden Qırımğa, Şevçenko kiralağan Simferopoldaki (Aqmescitteki) garaj qutusında saqlanğan patlayıcı aletni ketirdi. Qayd etilgenine köre, Aksönovnıñ marşrutını video nezareti kamerası vastasınen közetkenler.
2024 senesi kiçik ayda üçü de işğal etilgen Qırımda Rusiye FSBsiniñ hadimleri tarafından tutuldı. Olarğa qarşı "terroristik areketlerniñ azırlanuvı" ve "patlayıcı aletlerniñ qanunsız saqlanuvı" boyunca cinaiy davalar açıldı. Daa evel, saban ayınıñ 31-nde, Volodımır Bodnar da bu işte qabaatını tanıdı. Saban ayınıñ 3-nde mahkeme 75 yaşındaki Volodımır Ananyevniñ davasını baqtı.
Suspilne Qırım Volodımır Ananiyevniñ apayı, uquq qorçalayıcılar ve tanışlarınen subetleşip, Qırımnıñ eñ qart siyasiy mabüsiniñ "davası" aqqında tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
