Rusiye tarafından işğalli Qırım yolbaşçısı Serğiy Aksönovğa "öldürmege tırışqanı"nda qabaatlanğan Kıyiv sakini Volodımır Ananyevniñ apis müddeti boş ayğa qadar uzatıldı.
İlk yaz ayınıñ 28-nde onıñ tuvğanları Qırım uquq qorçalayıcı gruppasına (QUQG) bunı bildirdi.
O qoştı ki, işğalli mahkemeniñ nevbetteki oturışında ilk yaz ayınıñ 25-nde dava iştirakçilerini sorğuğa çekmek kerek ediler, amma oturış arman ayınıñ 20-ne avuştırıldı.
Hatırlatamız ki, ilk yaz ayınıñ 23-nde Volodımır Bondar, işğalli Qırım yolbaşçısı Serğiy Aksönovğa qarşı yapılğan ücümde qabaatlanğan ekinci şahıs, 13 yıl apis cezasına mahküm etildi.
Sergey Aksönovnı "öldürmege tırışuv" davası aqqında ne bilemiz
2025 senesi kiçik ayda Rusiye işğalcileri Sergey Aksönovğa qarşı suiqast azırlağanında qabaatlanğan Volodımır Ananyev, Volodımır Bodnar ve Oksana Şevçenkonı mahkemege berdi. İşğalli Qırım prokurorlığı dedi ki, ukrainler öz başına yapılğan patlayıcı alet yardımınen duşmannen işdeşlik yapqan Qırım sakininiñ maşinasını patlatmağa planlaştıra ediler.
Rusiye quvetçileriniñ malümatına köre, Bodnar Zaporijjâ vilâyetinden Qırımğa, Şevçenko kiralağan Simferopoldaki (Aqmescitteki) garaj qutusında saqlanğan patlayıcı aletni ketirdi. Qayd etilgenine köre, Aksönovnıñ marşrutını video nezareti kamerası vastasınen közetkenler.
2024 senesi kiçik ayda üçü de işğal etilgen Qırımda Rusiye FSBsiniñ hadimleri tarafından tutuldı. Olarğa qarşı "terroristik areketlerniñ azırlanuvı" ve "patlayıcı aletlerniñ qanunsız saqlanuvı" boyunca cinaiy davalar açıldı. Daa evel, saban ayınıñ 31-nde, Volodımır Bodnar da bu işte qabaatını tanıdı. Saban ayınıñ 3-nde mahkeme 75 yaşındaki Volodımır Ananyevniñ davasını baqtı.
Suspilne Qırım Volodımır Ananiyevniñ apayı, uquq qorçalayıcılar ve tanışlarınen subetleşip, Qırımnıñ eñ qart siyasiy mabüsiniñ "davası" aqqında tarif etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
