Jurnalist ve uquq qorçalayıcı Lütfiye Zudiyeva Rusiyege boysunğan işğal etilgen Qırım Adalet nazirliginden memuriy protokol tizmege çağırdı. O, "çetel agentleri" qanunını bozğanında qabaatlana.
Zudiyeva "Qırım birdemligi"ne bunı bildirdi.
Arman ayınıñ 27-nde o, Adliye nazirligine kelmek kerek.
"Memuriyetni ziyaret etecegim, memuriy protokol tizilmesi içün vesiqalar ve formal sebeplernen tanış olacağım. Menim barlığım soñki qararğa tesir etecegine emin degilim, amma menim içün açıq qalmaq, öz noqta-i nazarımnı añlatmaq ve qanun çerçivesinde areket etmek müimdir", — dedi Lutfiye Zudiyeva.
Onıñ aytqanına köre, 2025 senesi mayısnıñ 16-nda qabul etilgen "çetel agenti" olaraq tanılmasınıñ qararı, onıñ jurnalist faaliyetinen bağlıdır. Bu, Ukrayinanıñ mustaqil neşiri Gratı saytında Qırım siyasiy mabüsleriniñ mahkeme esnasları aqqında derc etilgen maqaleler, em de CNN, Newsweek, Committee to Protect Journalists ve diger halqara kütleviy haber vastaları ve uquq qorçalayıcı teşkilâtlarnen yapılğan intervyulardır. Bu intervyularda o, faalciler, jurnalistler, advokatlar ve diniy erbaplarnıñ taqip etilüvi aqqında tarif etti.
Bundan ğayrı, Adalet nazirligi Zudiyeva Front Line Defenders uquq qorçalayıcı teşkilâtınıñ azası olğanını iddia ete. Jurnalist "çetel agentleri" cedveline kirsetilüvini mahkemede şikâyet ete.
Hatırlatamız ki, ilk yaz ayında Lütfiye Zudiyeva Rusiye Federatsiyası Adalet nazirligine qarşı Rusiyeniñ "çetel agentleri cedveli"ne kirsetilmesi boyunca davalaşa.
Lütfiye Zudiyeva aqqında ne bilemiz
Lütfiye Zudiyeva, "Qırım birdemligi"niñ ve "Gratı"nıñ jurnalistidir. Qırımdaki makeme ceryanları ve insan aqları bozmalarını aydınlata. 2014 senesinden evel bala merkezini reberlik ete edi, işğalden soñ ise uquq qorçalav saasında çalışmağa başladı.
2019 senesi içtimaiy ağlarda post sebebinden Zudiyeva tutuldı. O zaman "aşırıcılıq timsaller"nen paylaşqan faalci, 2 biñ ruble cezasını ödedi.
Oraq ayınıñ 27-sinde işğal etilgen Qırım Yuqarı makemesinde video bağ vastasınen Soçi şeerindeki umumiy yurisdiktsiyalı Üçünci Apellâtsiya makemesinen berbaber "Nariman Celâl ve Ahtemov qardaşlarınıñ davası"na bianen üküm çıqarıdı. "Makeme" binası ögünde Lütfiye Zudiyeva da tutuldı. Birazdan jurnalistke 12 biñ rublelik para cezasını berdi. 2024 senesi kiçik aynıñ 12-inde RF Kasatsiya makemesi, para cezasına şikâtenamesini baqmağa aldı.
Kiçik aynıñ 22-siniñ sabasında işğal uquq qorçalayıcıları organlarınıñ işçileri, Lütfiye Zudiyevanıñ evini tinttiler. Bundan soñ faalcini böyle degen Aşırıcılıqqa qarşı merkezine kettiler. 3 saat anda buluna edi. "Kütleviy malümat azatlığı suisitmalı" sebebinden oña qarşı memuriy protokollar tizildi.
Saban ayında Aqmescitteki işğali Kiyev rayon makemesi uquq qorçalayıcığa Rusiye Federatsiyası Memuriy cinayetler qanunnamesiniñ 13.15 maddesiniñ 2.1 qısmına ("Kütleviy haber serbestligini qullanuvı") binaen 2 500 rublelik (1 059 grivna) para cezasını berdi.
Mayıs ayında İçki işler nazirliginiñ "Canköy" işğalli bölüginiñ vekili Zudiyevağa mitinglerniñ keçirilmesi yasaq olğanı aqqında tenbiname berdi.
Bozarğan ayda Kıyiv rayon makemesi, qırımtatar jurnalisti Lütfiye Zudiyevağa dair barışıq makemecisiniñ qararına apellâtsiya şikâyetnamesini baqtı ve "kütleviy haber azatlığınıñ suistimalı" sebebinden jurnalistni memuriy mesüliyetke çekmege qararını deñiştirmedi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
