Advokat Emil Kurbedinov Qırımnıñ işğalli Nıjnöğirsk rayonı (şimdiki Bilogirsk rayonı) prokurorlığına muracaat etip, "polis hadimleri" çiçek ayınıñ 3-nde siyasiy mabüs Vadım Siruknıñ ömür arqadaşı Anna Boğaçovanıñ evine kelgen soñ, "polis hadimleri öz vazifelerini aşqanı"nı bildirdi. Onı "İzvestiya" teşviqiy neşiriniñ mühbiri Aleksandr Fedorçaknıñ mezarını yaqqanı aqqında soradılar.
Çiçek ayınıñ 7-nde Kurbedinov "Qırım birdemligi" cemaat teşkilâtına bunı bildirdi.
Onıñ aytqanına köre, ziyaret vaqtında "polis hadimi" qadınnı "artıq maşna aydamağa ve olarnıñ rayonında yaşamağa yasaq etmege qorquttı". Boğaçovanı olarnen beraber ketmege çağırdılar, lâkin bu aqqında vesiqa berilmedi.
"Polis hadimi" oña cevap berip, "munasebetni bozmamaq kerek" dedi, aks alda, olar nevbetteki kere tintüv içün vesiqalarnen kelecekler, ve "onıñ alı fena olacaq".
Advokat muracaatında bu "polis hadimleri"nşñ areketlerini teşkermege rica ete ve bu ziyaret "açıq-aydın siyasiy" olğanını qoştı.
"Er kes, hususan uquq qorçalayıcı organları, Vadım ve oña beñzer mabüsler, siyasiy mabüsler olğanını bile. Bu insanlar iç bir vaqıt zorbalıq, terrorizm ya da aşırıcılıq areketlerine qoşulmağan edi. Amma buña baqmadan, olarnı çeşit cedveller ve terroristler cedvellerine kirsete. Tek bu sebepten olar ve qorantaları taqip etile", — dep Kurbedinov añlattı.
Hatırlatamız ki, çiçek ayınıñ 3-nde Anna Boğaçovanıñ evine Bilogirsk rayonından "polis hadimleri" keldiler. Onıñ aytqanına köre, olarnıñ arasında yerli işğalli cezalandıruv taqiqatınıñ "mayorı" ve özüni tanıtmağan eki grajdan kiyimli hadim bar edi. Olar belgisiz bir maşnanen keldiler ve Fedorçaknıñ mezarı yaqılğanını bilgenini ögrenmege tırıştılar.
İşğalciler, qadın "Qırım birdemligi" kibi teşkilâtlarnıñ vekillerinen bağ tutıp tutmağanını ögrenmege tırıştılar ve şimdi musulman olsa, onı "aşırıclıq gruppaları celp etkeni"ni iddia ettiler. "Polis hadimleri" Annanıñ aqayınıñ qardaşını alıp kettiler, soñra evge qaytardılar.
Boğaçova advokatsız cevap bermege razı olmadı, sorğuğa çekilmek kerek olsa, oña celpnameni bermege teklif etti. Cevap olaraq siyasiy mabüsniñ apayı qorquzuvlarğa oğradı.
Boğaçovanıñ aqayı Vadım Siruk, Başqırstan Cumhuriyetiniñ Salavat şeerindeki 2-nci tüzetüv müstemlekesinde cezasını çeke. "Hizb ut-Tahrir" davasınıñ Yalta gruppasınıñ iştirakçisi 12 yılğa üküm etildi.
Rusiye teşviqatçısı Aleksandr Fedorçak ve daa üç Rusiye arbiy adamınıñ mezarlıqları saban ayınıñ 31-nde işğal etilgen Qırımda Nijnögirsk köyünde yanğan edi.
Saban ayınıñ 24-nde "İzvestiya" Rusiye neşiri öz "cenk mühbiri"niñ elâk oluvı aqqında haber etti. İlk neşirde Fedorçak Kupyansk yönelişinde çalışqanı yazıldı. Daa soñra, işğal etilgen Luğansk vilâyetinde top ateşinde elâk olğanını bildirdi. Ukraina tarafı bu haberlerni izaatlamadı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
