Çiçek ayınıñ 3-nde siyasiy mabüs Vadım Siruknıñ apayı Anna Boğaçovanıñ evine işğalli Qırım polisiniñ hadimleri keldiler: "İzvestiya" neşiriniñ teşviqatçısı Aleksandr Fedorçaknıñ mezarı yaqılğanını bilemi, dep soradılar.
Bunı "Qırım birdemligi" bildirdi.
"O, yerli cinaiy taqiqat bölüginiñ mayorı Kuzma Konosov ve özüni tanıtmağan, vatandaş urbasında olğan eki hadim edi. Üçü de adiy maşnalarnen keldi — polis işaretleri yoq edi", — dep aytıla haberde.
Anna Boğaçovanıñ aytqanına köre, ziyaret vaqtında evde edi. Qapını açmağa olarğa Vadımnıñ tuvğan qardaşı Siruk yardım etti, onı quvetçiler ketirdiler. Boğaçovanı çıqmağa rica ettiler, evde bir şey tutmadılar.
"Subet vaqtında mayor Konosov apiste yatqan aqayı aqqında soradı, onıñnen bağları ve apis müddeti aqqında soradı. Soñra Boğaçovanıñ özünen bağlı sualler peyda oldı: kimnen yaşay, yerli mezarlıqta "İzvestiya" arbiy mühbiri Aleksandr Fedorçaknıñ mezarı yaqılğanını bilemi", — dep "Qırım birdemligi" bildirdi.
Qadın, tanışları ve advokatına haber etkenini bildirgen soñ, "polis hadimi" onıñ qullanğan messencerlerini ögrenmege başladı ve telefonını almaqnen qorquzğanını bildirdi, dep "Qırım birdemligi" yazdı. Boğaçova advokatsız suallerge cevap bermege razı olmadı, ve polisniñ sualleri olsa, oña celpnameni bermege teklif etti.
"Mına buña cevap olaraq, mayor, men işbirlik yapmasam, olar tintüv içün vesiqalarnen kele bilirler ve bundan soñ maşna sürmege ya da bu rayonda yaşamağa yasaq ete bilirler, dep qorquzıp başladı. Bu vaqialarnen iç bir alâqam yoq", — dep Boğaçova tarif etti.
İşğalciler, qadınnıñ "Qırım birdemligi" kibi teşkilâtlarnıñ vekillerinen bağ tutıp tutıp-tutmağanını ögrenmege tırıştılar ve şimdi musulman olsa, onı "aşırıcılıq gruppaları celp etkeni"ni iddia ettiler. "Polis hadimleri" Anna aqayınıñ qardaşını alıp kettiler, soñra evge yiberdiler.
Boğaçovanıñ aqayı Vadım Siruk, Başqırtistan Cumhuriyetiniñ Salavat şeerindeki 2-nci apishanede cezasını çeke. "Hizb ut-Tahrir" davasınıñ Yalta gruppasınıñ qabaatlanğan iştirakçisi 12 yılğa üküm etildi.
Hatırlatamız ki, Rusiye teşviqatçısı Aleksandr Fedorçak ve daa üç Rusiye arbiy adamınıñ mezarlıqları saban ayınıñ 31-nde işğal etilgen Qırımda Nijnögirsk köyünde yaqıldı.
"İzvestiya" Rusiye neşiri saban ayınıñ 24-nde öz "cenk mühbiri"niñ elâk oluvı aqqında haber etti.
İlk neşirde Fedorçak Kupyansk yönelişinde çalışqanı yazılğan edi. Daa soñra, işğal etilgen Luğansk vilâyetinde top ateşi neticesinde elâk olğanını bildirdi. Ukraina tarafı bu haberlerni izaatlamadı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
