Ukraina gimnastikacısı Anna Rizatdinova, Ukraina prezidentiniñ Qırım Muhtar Cumhuriyetindeki Temsilciliginiñ "Serbest Qırımğa mektüpler" teşebbüsi çerçivesinde Vadım Siruknıñ mektübini oqudı. Siyasiy mabüs Rusiye tarafından "terrorizm" qabaatınen qanunsız tutulğan edi ve 2019 senesi boş aynıñ 12-nde 12 yılğa üküm etildi.
Qara qış ayınıñ 17-nde QMCdeki Temsilcilik Telegramda bunı bildirdi.
Şu anda Vadım Siruk Rusiyeniñ Başqırstan Cumhuriyetiniñ Salavat şeerindeki 2-nci apishanede buluna. Siyasiy mabüs tiş meseleleri, sıq suvuqlanuvı ve kerekli tibbiy yardım körmemesi aqqında şikâyet ete.
"Serbest Qırımğa mektüp" teşebbüsine qoşulıñız: mektüp yazıñız, dostlarıñızğa ve zenaatdaşlarıñızğa aktsiya aqqında aytıp beriñiz, içtimaiy ağlarda malümatnen paylaşıñız. Bu qolay adımlar vatandaşlarımızğa, bütün manialarğa baqmadan, olarnıñ serbestligi içün küreşkenimizni añlatmağa yardım etecek", — dep Temsilcilik muracaat etti.
Vadım Siruk aqqında ne bilemiz
Vadım cemiyetniñ faal azası edi, diniy binalarnıñ, hususan Vasilivka köyündeki caminiñ ğayrıdan tiklenüvine qoşuldı, Simeizde qadimiy mezarlıqnı qorçaladı, bayram tedbirlerini teşkil etti ve diniy merasimlerde iştirak etti.
Qırım işğali ve istilâsı sebebinden Rusiye tarafından repressiyalar ve taqipler başlanğan soñ Vadım siyasiy mabüslerniñ qorantalarına faal destek kösterdi, qanunsız "makemeler"ge barıp, siyasiy mabüslerniñ qorantalarına maneviy ve maddiy destek kösterdi.
2016 senesi kiçik ayınıñ 11-nde işğal etilgen Yalta ve Aluştada işğalli memuriyetniñ quvetçileri yerli sakinlerniñ evlerinde qanunsız kütleviy tintüvler keçirdi. O künü Vadım Siruknen beraber diniy erbap Muslim Aliyev, uquq qorçalayıcı Emir-Usein Kuku ve mektep qorçalayıcısı İnver Bekirov tutuldı.
2020 senesi bozarğannıñ 25-nde Rusiyeniñ Moskva vilâyetindeki Vlasiha şeer makemesi Vadım Siruknıñ istinaf şikâyetini red etti.
Appelâtsiya red etilgen soñ, siyasiy mabüs Qırımdan 2000 km uzaqlıqta yerleşken Rusiye Federatsiyasınıñ Başqırstan Cumhuriyetiniñ Salavat şeerindeki İK-2 müstemlekesine etap etildi.
O, anda kelgende, qanunsız alda 17 künge ceza izolâtorına qapatıldı. Bundan da ğayrı, yaramay ava, yahşı anşama ve vitamin qıtlığı sebebinsen, siyasiy mabüsniñ sağlığı daima fenalaşa. Bundan da ğayrı, onıñ tişlerinem meseleleri bar, apishaneniñ tiş ekimi ise kerekli yardım köstermek içün kelmey.
Telegram, WhatsApp ve Facebookta Suspilne Qırım haberlerine abune oluñız
