Qırımnıñ işğalli polisi kiçik aynıñ 20-nde qırımtatar faalcisi ve jurnalisti Lütfiye Zudiyevağa qanunsız areketlerniñ qabul etilmemesi aqqında tenbiyelemege tırıştı. Quvetçiler kelgen vaqıt qadın evde yoq edi.
Bunı Lütfiye Zudiyeva Facebook saifesinde yazdı.
Onıñ aytqanına köre, o, polis ziyareti aqqında qaytqan soñ ögrendi.
"Bir taraftan, bu planlaştırılğan kiçik aynıñ "işlenüvi" olğanı añlaşılır, ve Qırım İçki işler nazirligi bu mesele üzerinde muntazam sürette areket ete. Diger taraftan, organlarda bir insan qanunsızlıq ya da cinayet işlemek niyetinde olğanını tüşünmek içün faraziy sebepler degil de, kerçek sebepler olmalı. Ve bu muayyen areketler ihtar metninde qayd etilmeli. 2020 senesi, Rusiye İçki işler nazirliginiñ "Canköy" beledielerara bölüginiñ yolbaşçısınıñ apiske alınmasını qanunsız tanımaq içün dava açqanda, bunı makemede añlatmağa tırıştım, amma faydası olmadı. Dairege yürüv devam ete", — dep yazdı o.
Lütfiye Zudiyevanıñ aytqanına köre, aynı tenbiyelemelerni Canköy şeerinde ve Canköy rayonında bir qaç insan aldı.
Hatırlatamız ki, Qırımnıñ işğalli polisiniñ hadimleri uquq qorçalayıcı Ayder Süleymanovğa qanunsızlıq yapmaq mümkün olmağanı aqqında tenbiname bildirdiler. Bundan da ğayrı, olar Nadir Aliyev ve Delâver Ablayevnen subetleşmege tırıştılar.
Lütfiye Zudiyeva aqqında ne bilemiz
Lütfiye Zudiyeva, "Qırıjm birdemligi"niñ faalcisi ve "Gratı"nıñ jurnalistidir. Qırımdaki makeme ceryanları ve insan aqları bozmalarını aydınlata. 2014 senesinden evel bala merkezini reberlik ete edi, işğalden soñ ise uquq qorçalav saasında çalışmağa başladı.
2019 senesi içtimaiy ağlarda post sebebinden Zudiyeva tutuldı. O zaman "aşırıcılıq timsaller"nen paylaşqan faalci, 2 biñ ruble cezasını ödedi.
Oraq ayınıñ 27-sinde işğal etilgen Qırım Yuqarı makemesinde video bağ vastasınen Soçi şeerindeki umumiy yurisdiktsiyalı Üçünci Apellâtsiya makemesinen berbaber "Nariman Celâl ve Ahtemov qardaşlarınıñ davası"na bianen üküm çıqarıdı. "Makeme" binası ögünde Lütfiye Zudiyeva da tutuldı. Birazdan jurnalistke 12 biñ rublelik para cezasını berdi. 2024 senesi kiçik aynıñ 12-inde RF Kasatsiya makemesi, para cezasına şikâtenamesini baqmağa aldı.
Kiçik aynıñ 22-siniñ sabasında işğal uquq qorçalayıcıları organlarınıñ işçileri, Lütfiye Zudiyevanıñ evini tinttiler. Bundan soñ faalcini böyle degen Aşırıcılıqqa qarşı merkezine kettiler. 3 saat anda buluna edi. "Kütleviy malümat azatlığı suisitmalı" sebebinden oña qarşı memuriy protokollar tizildi.
Saban ayında Aqmescitteki işğali Kiyev rayon makemesi uquq qorçalayıcığa Rusiye Federatsiyası Memuriy cinayetler qanunnamesiniñ 13.15 maddesiniñ 2.1 qısmına ("Kütleviy haber serbestligini qullanuvı") binaen 2 500 rublelik (1 059 grivna) para cezasını berdi.
Mayıs ayında İçki işler nazirliginiñ "Canköy" işğalli bölüginiñ vekili Zudiyevağa mitinglerniñ keçirilmesi yasaq olğanı aqqında tenbiname berdi.
Bozarğan ayda Kıyiv rayon makemesi, qırımtatar jurnalisti Lütfiye Zudiyevağa dair barışıq makemecisiniñ qararına apellâtsiya şikâyetnamesini baqtı ve "kütleviy haber azatlığınıñ suistimalı" sebebinden jurnalistni memuriy mesüliyetke çekmege qararını deñiştirmedi.
Telegram, WhatsApp ve Facebookta Suspilne Qırım haberlerine abune oluñız
