Ukrayinada Rusiye arheologı Aleksandr Butâginniñ qabaatlavı Ukrayina Ceza qanunnamsiniñ 438-inci maddesine deñiştirildi. O cenk cinayetleri içün mesüliyetke çekilmesini közde tuta. Daa evel oña qarşı cinaiy dava UCQniñ 298 maddesi boyunca açılğan edi.
Qırım ve Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeri prokurorlığına atfı etip, İnsan aqları bölge merkezi bunı bildirdi.
Butâgin, cenk qanunlarını ve adetlerini bozğanında şübelengen ilk arheolog oldı, dep merkezniñ mütehassısları qayd ettiler.
"Butâgin 2014 senesinden berli Rusiye müessiselerinden izin ala ve işğal etilgen Qırımnıñ Keriç civarındaki Mirmekiy qasabası toprağında qazma işlerni keçire. Buña baqmadan, O. M. Butâgin, halqara silâlı zıddiyet şaraitinde ve onıñnen bağlı olaraq, bir gruppa şahıslarnıñ evelden añlaşıp, vaqtınca işğal etilgen Qırım Muhtar Cumhuriyetiniñ toprağında bulunıp, arbiy zaruriyet sebebinden olmağan, qanunsız ve mantıqsız şekilde yapılğan mülkniñ (arheologik miras obyektiniñ) keniş miqyaslı yoq etilüvi ve saip etilüvini yaptı", — dep yañı qabaatlavda qayd etildi.
Hatırlatamız ki, çiçek ayınıñ 28-nde Rusiye arheologı Aleksandr Butâgin Poloniya apishanesinden azat etildi. Bu Poloniya ve Belorusiye arasında esirlerni deñiştirüv çerçivesinde yapıldı.
Aleksandr Butâgin kimdir
Aleksandr Butâgin — Rusiye arheologı, antikaşınas ve Rusiye Federatsiyasınıñ "Devlet Ermitajı"nıñ Şimaliy Qara deñiz yanındaki qadimiy arheologiya sektorınıñ müdiri. 1999 senesinden başlap o, Qırımdaki Mirmek arheologik ekspeditsiyasınıñ yolbaşçısı edi. İşğal etilgen topraqlardan Ukrayina medeniy degerlikleriniñ hırsızlanmasında iştirak etken şahıslarnıñ cedveline kirsetildi.
2022 senesi Rusiye arheologı Aleksandr Butâgin işğal etilgen Qırımnıñ Keriç civarındaki qadimiy Mirmek şeerinde qazma yapqanda, Rusiyege çıqarılğan Aleksandr Makedonskiy zamanına ait 30 para hazinesini taptı. Onıñ fiyatı 8,5 million ğrıvnâdan ziyadedir. İşğal etilgen Ukrayinada qanunsız çalışqanı içün oña şübe bildirildi.
Qırım Muhtar Cumhuriyeti prokurorlığı Suspilne Qırımğa bildirdi ki, Butâgin — cinaiy dava açılğan bir qaç arheologlardan biridir: umumen yedi adamğa şübe bildirildi, olarnıñ arasında — Qırımdaki qazmalarda iştirak etken em Rusiye, em de Ukrayina vatandaşları bar. Qırımnıñ Rusiye arheologları tarafından nasıl zapt etilgeni aqqında daa tafsilâtlı malümatnı maqaleden oquñız.
Rusiye arheologı Aleksandr Butâgin ilk qış ayınıñ 4-nde Felemenkten Poloniya üzerinden Balkanlarğa ketkende Poloniya mahsus hızmetleri tarafından tutuldı. Poloniya kütleviy haber vastalarınıñ malümatına köre, o, Poloniya prokurorlığında ifade bermekten vazgeçti. Onı 40 künge apiske aldılar.
İlk qış ayınıñ 23-nde Ukrayina resmiy şekilde Poloniyağa, işğal etilgen Qırımda qanunsız qazma işlerinen oğraşqanında şübelengen ve Varşavada tutulğan Rusiye arheologı Aleksandr Butâginniñ ekstraditsiyası aqqında muracaat yolladı.
Qara qış ayınıñ 12-nde Varşava mahkemesi Rusiye arheologı Aleksandr Butâginniñ apis müddetini saban ayınıñ 4-ne qadar uzattı.
Kiçik aynıñ 10-nda Varşavadaki Apellâtsiya mahkemesi Butâginniñ Poloniyada vaqtınca tutuvınıñ qanuniyligini tasdıqladı.
Saban ayınıñ 18-nde Varşava bölgesi mahkemesi, işğal etilgen Qırımda qanunsız qazma işlerinde şübelengen Rusiye arheologı Aleksandr Butâginniñ ekstraditsiyası aqqında Ukratina talabını qanaatlendirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
