Rusiye arheologı Butâgin Poloniya apishanesinden azat etildi. Bu Poloniya ve Belarus arasında esirlerni deñiştirüv çerçivesinde yapıldı.
Poloniya Tış işler naziri Radoslav Sikorskıy bunı bildirdi.
"Deñiştirilgen insanlarımızdan biri — Ukrayinağa teslim etilüv esnasında bulunğan Rusiye tarihçısıdır", — dep Sikorskıy ayttı.
Baş prokurornıñ ofisiniñ spikeri Maryana Ğayovska-Kovbasük, ukrayin tarafı Rusiyeniñ vatandaşı Butâginniñ Ukrayinada cinaiy mesüliyetke çekilmesi içün onıñ ekstraditsiyasını talap etkenini Suspilnege bildirdi.
"Poloniya Cumhuriyetiniñ mütehassıs organları Ukrayina tarafından berilgen malümatqa qıymet kesti ve onı Ukrayinağa berüv meselesini çezmek içün yeterli dep tanıdı. Bundan soñ Butâgin ile bağlı qarar, tutulğan şahıslarnı deñiştirüvnen bağlı halqara añlaşmalar çerçivesinde qabul etildi. Baş prokurornıñ Ofisi Ukrayina ve onıñ medeniy mirasına qarşı yapılğan cinayetler içün bu şahısnı mesüliyetke çekmek içün bütün milliy ve halqara mehanizmlerni qullanmağa devam etecek", — dep spiker haber etti.
Hatırlatamız ki, saban ayınıñ 18-nde Varşava bölgesi mahkemesi, işğal etilgen Qırımda qanunsız qazma işlerinde şübelengen Rusiye arheologı Aleksandr Butâginniñ ekstraditsiyası aqqında Ukratina talabını qanaatlendirdi.
Kiçik aynıñ 10-nda Varşavadaki Apellâtsiya mahkemesi Butâginniñ Poloniyada vaqtınca tutuvınıñ qanuniyligini tasdıqladı.
Rusiye arheologı Aleksandr Butâgin ilk qış ayınıñ 4-nde Felemenkten Poloniya üzerinden Balqanlarğa ketkende Poloniya mahsus hızmetleri tarafından tutuldı. Poloniya kütleviy haber vastalarınıñ malümatına köre, o, Poloniya prokurorlığı ögünde ifade bermekten vazgeçti. Onı 40 künge apiske aldılar.
İlk qış ayınıñ 23-nde Ukrayina resmiy şekilde Poloniyağa, işğal etilgen Qırımda qanunsız qazma işlerinen oğraşqanında şübelengen ve Varşavada tutulğan Rusiye arheologı Aleksandr Butâginniñ ekstraditsiyası aqqında muracaat yolladı.
2022 senesi Rusiye arheologı Aleksandr Butâgin işğal etilgen Qırımnıñ Keriç civarındaki qadimiy Mirmek şeerinde qazma yapqanda, Rusiyege çıqarılğan Aleksandr Makedonskiy zamanına ait 30 para hazinesini taptı. Onıñ fiyatı 8,5 million ğrıvnâdan ziyadedir. İşğal etilgen Ukrayinada qanunsız çalışqanı içün şübelendi.
Qırım Muhtar Cumhuriyeti prokurorlığı Suspilne Qırımğa Butâginniñ dava açılğan bir qaç arheologdan biri olğanını bildirdi: umumen yedi şübheli, olarnıñ arasında Qırımdaki qazmalarda iştirak etken em Rusiye, em de Ukrayina vatandaşları bar. Qırımnıñ Rusiye arheologları tarafından nasıl zapt etilgeni aqqında tafsilâtlıca malümatnı maqalede oquñız.
Qara qış ayınıñ 12-nde Varşava mahkemesi Rusiye arheologı Aleksandr Butâginniñ apis müddetini saban ayınıñ 4-ne qadar uzattı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
