Varşava mahkemesi, işğal etilgen Qırımda qanunsız şekilde qazma işleri yapqanında şübelengen Rusiye arheologı Aleksandr Butâginniñ apis müddetini saban ayınıñ 4-ne qadar uzattı.
"Slawa TV" bu aqqında haber etti.
Arheolognıñ Ukrayinağa ekstraditsiyası boyunca oturış qara qış ayınıñ 15-nde saat 10:30-ta Varşavadaki Okrug mahkemesinde başlanacaq.
Mahkemeci Dariuş Lübovskıy Butâginniñ Ukrayinağa berilmesine manialar olıp-olmağanına dair qarar alacaq. O, Almaniyanıñ "Şimaliy aqım" gaz borusında şübheli sayılğan ukrayinalını teslim etmesini red etken mahkemecidir.
İlk qış ayınıñ 4-nde Felemenkten Poloniya üzerinden Balkanlarğa ketkende Rusiye arheologı Aleksandr Butâgin Poloniya mahsus hızmetleri tarafından tutuldı. Poloniya kütleviy haber vastalarınıñ malümatına köre, o, Poloniya prokurolığında ifade bermekten vazgeçti. Onı 40 künge apiske aldılar.
İlk qış ayınıñ 23-nde Ukrayina resmiy şekilde Poloniyağa, işğal etilgen Qırımda qanunsız qazma işlerinen oğraşqanında şübelengen ve Varşavada tutulğan Rusiye arheologı Aleksandr Butâginniñ ekstraditsiyası aqqında muracaat yolladı.
2022 senesi Rusiye arheologı Aleksandr Butâgin işğal etilgen Qırımnıñ Keriç civarındaki qadimiy Mirmek şeerinde qazma yapqanda, Rusiyege çıqarılğan Aleksandr Makedonskiy zamanına ait 30 para hazinesini taptı. Onıñ fiyatı 8,5 million ğrıvnâdan ziyadedir. İşğal etilgen Ukrayinada qanunsız çalışqanı içün şübelendi.
Qırım Muhtar Cumhuriyeti prokurorlığı Suspilne Qırımğa Butâginniñ dava açılğan bir qaç arheologdan biri olğanını bildirdi: umumen yedi şübheli, olarnıñ arasında Qırımdaki qazmalarda iştirak etken em Rusiye, em de Ukrayina vatandaşları bar. Qırımnıñ Rusiye arheologları tarafından nasıl zapt etilgeni aqqında tafsilâtlıca malümatnı maqalede oquñız.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
