Ukrayinada Qırım tamır halqlarınıñ 17 vekili devletliginiñ pekitilüvi, mustaqilliginiñ qoruvı ve cemaat ayatınıñ inkişafına qoşqan issesi içün devlet mukâfatınen taqdirlendi. Mukâfatlanğanlar arasında siyasiy mabüslerniñ azat etilmesi içün ğayretlerni quvetleştirmege çağırğan sabıq Kreml siyasiy mabüsi Leniye Umerova, prodüser Akim Halimov ve jurnalist Naciye Ametova bar.
Mukâfatlandıruv tedbirine Suspilne Qırım jurnalistleri keldiler.
Mukâfatlanğanlardan biri — sabıq Kreml siyasiy mabüsi Leniye Umerova. Bugün o, III derece "Yararlıq içün" nişanını aldı ve çıqışında Qırımdaki bütün siyasiy mabüslerni azat etmek kerekligini qayd etti.
"Siyasiy mabüslerimiz meselesi ve tek siyasiy mabüsler degil de, cenk esirleri, vatandaş mabüsleri, siyasiy mabüsler — bu müimdir. Anda insanlar bu apishanelerde öleler, olar fizikiy ve ruhiy ceetten yaramay aldalar. Çoqusı fizikiy, ruhiy azap çekeler. Ve Qırımnıñ qaytarıluvı, adamlarımıznıñ qaytarıluvı meselesi kritiktir. Onıñ içün biz toqtamayıp aytmaq kerekmiz, ağaçlarnı yağan quşlar kibi, biz cemaat teşkilâtlarını, ukrayin institutlarını, halqara teşkilâtlarnı, adamlarımıznı qaytarmaq ve olarğa azatlıq bermek içün yalamaq kerekmiz", — dep Suspilne Qırım jurnalistlerine Leniye ayttı.
Akim Halimov, prodüser ve vesiqalı-tarihiy leyhalarnıñ müellifi, II derece "Yararlıqlar içün" ordenini aldı. O, ukrayinler ve qırımtatarlar arasında ortaq munasebetlerni qayd etti.
"Bugün, bizler ukrayinler ve qırımtatarlar arasında tarihta ortaq işaretlerni tapmağa tırışqanda, bizge añlamaq kerek ki, asırlar devamında yan-yanaşa Rusiye imperialismine qarşı küreşken ve alâ daa küreşken başqa halqlar yoq. Ve menimce, bugün biz tek qardaşlıq aqqında degil, biz bir siyasiy millet aqqında laf etemiz. Bu küreş bu siyasiy milletni yarattı", — dep Halimov bildirdi.
Naciye Ametova, "QIRIM.Media" online neşiriniñ baş muarriri, cemaat erbabı, bugün "Ukrayinanıñ nam qazanğan jurnalisti" fahriy unvanını aldı. Suspilne jurnalistlerine o, şimdi daa büyük mesüliyetlik duya, dep ayttı.
"Men özüme million sual berem — bu müim mukâfatnı qazanmaq içün yeterli qadar şey yaptımmı. Men pek büyük bir mesüliyet duyam, çünki kerçekten de bizler şimdilik, teessüf ki, irişip olamağan bir topraq aqqında laf etemiz. Ve biz Ukrayinanıñ sesi, dünyanıñ sesi anda eşitilmesini pek isteymiz. İşğal etilgen Qırımda insanlarğa Ukrayina aqqında tarif etmek isteymiz. Ve bu pek büyük bir mesüliyet, kerçekten de, bizim içün. Bu mukâfat içün ğurur ve minnetdarlıq duyam ve ileride de mukâfatnı qazanmaq içün elimden kelgenini yapacağım", — dep Ametova qayd etti.
Prezident Zelenskıy, mukâfatlandıruv esnasında, Rusiyeniñ Qırımdaki ukrayinlerge qarşı cinayetleri, bütün Ukrayinada olğanı kibi, cezasız qalmaycağını qayd etti.
"Şimdi eñ printsipial şekilde küreşemiz ki, istilâcı cenk içün iç bir mukâfat almasın, Rusiye er şey içün, bizge, halqımızğa, bütün Ukrayinağa qarşı istilâ içün cevap bersin ve Rusiyege qarşı insanlarğa, devletke, suverenitetke, mustaqillikke, Qırımımızğa qarşı yapılğan cinayetler cezasız qalmasın dep. Biz bu cenkni Ukrayina içün lâyıq bir barışıqnen bitirecekmiz ve yañı Rusiye istilâsı olmaycaq, Rusiye raketaları ve işğalcileri olmaycaq ve Rusiye istilâsından qorçalavlar yeterli olacaq. Bu bizim toprağımız, bu bizim Qırımımız, ukrayin halqımız, Ukrayina tamır halqımız, qırımtatar halqımızdır", — dep Zelenskıy bildirdi.
Qırımtatar Milliy Meclisiniñ reisiniñ muavini İlmi Umerov I derece "Yararlıqlar içün" nişanını aldı.
III derece "Yararlıqlar içün" nişanınen taqdirlengenler arasında:
- Mustafa Ametov — "Qırımtatar tiliniñ inkişafı institutı" cemaat birleşmesiniñ reisi, jurnalist, yazıcı.
- Arsen Jumadilov — Ukrayina Mudafaa nazirliginiñ Devlet müessisesiniñ müdiri, cemaat ve siyasiy erbabı.
- İrfan Mirzoev — Ukrayina yunan-roma küreşi milliy taqımınıñ idmancı-telimcisi.
- Ayder Rustemov — Qırım musulmanları diniy idaresiniñ reisi
- Nariman Süleymanov — Qırım Muhtar Cumhuriyeti ve Sevastopol (Aqyar) şeeri prokurorlığınıñ yolbaşçısı.
- Lenur Temirov — Ukrayina yunan-roma küreşi milliy taqımınıñ baş idmancısı.
III derece knâğinâ Olğa nişanı göñülli ve iş adamı Emine Emirsalievağa da berildi.
Şerefli unvanlarnı alğanlar arasında:
- Ukrayina halq artisti — Cemil Karikov — bestekâr ve konsertmeyster.
- Ukrayina halq ressamı — Rustem Skıbin — ressam-keramist, dizayner.
- Ukrayinanıñ nam qazanğan ocası — Gülnaz Acigeldiyeva ve Afize Emiramzayeva — "Birlik mektep" qırımtatar litseyi" şahsiy müessisesiniñ ocaları.
- Nam qazanğan tasil hadimi — Sabrie Slaston — Taras Şevçenko adına Kıyiv milliy universitetiniñ Tasil-ilmiy filologiya institutı kafedrasınıñ ocası.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
