2025 senesi orta küz ayınıñ 21-nde İrfan Mirzoyev 23 yaşına qadar sportçılar arasında Yañı Sadda ötkerilgen Dünya yunan-roma küreş çempionatında 77 kg ağırlığında altın medal qazandı.
İrfan — qırımtatar, tolu miqyaslı istilâ başlanğan soñ yarımadanı terk etti, şimdi Poltava vilâyeti ve Qırımnı temsil ete.
İrfan Mirzoyev ve onıñ Rusiye tarafından zapt etilgen yarımadanı terk etken idmancısı Lenur Temirov ile Suspilne Qırım jurnalistleri subetleştiler.
İrfannen Kıyivde idman vaqtında körüşemiz. Sportçunıñ aytqanına köre, qızdıruv ve çift olaraq işke başlamazdan evel, bir-birinen daima bağda olmaq pek müimdir.
2025 senesi qara qış ayında Dünya çempionatında Mirzoyev gürci Temuri Orconikidzenen revanş aldı. Bu, sportçunıñ halqara yarışlarda birinci altınıdır.
"İkinci ya da üçünci yerde olmağanıñ duyğularnı añlatmaq imkânsız, amma çempion olğanda, ve bayraq ile idmancıñnen kilim boyunca yürgende, ve şeref kürsüsine turğanda, ve ülkeniñ gimni yırlağanda pek yahşı duyğularnı sezesiñ. Bütün oğlanlarnıñ bunı is etmesini isteyim", — dep İrfan Mirzoyev ayttı.
Sportçu dey ki, bu vaqıtqa qadar,pek çoq yeñiş ve muvafaqiyetsizlik oldı. Amma olar meni toqtamayıp, ilerilemege ögrettiler.
Mirzoyev dört yıl evelsi, 17 yaşında olğanda, Ukrayina temsilcisi olmaq aqqını qazandı. Dünya ve Avropa çempionatlarınıñ defalarca ğalibi edi.
"Böyle bir çoq yutquzuvdan soñ, dünya çempionatında altın qazansañ, çalışmaq kerek olğanını añlaysıñ, çalışmaq, çalışmaq kerek, bu yutquzuvlar bile er şey degil. Özüñe inanmaq kereksiñ — ve er şey keçer", — dep İrfan Mirzoyev ayttı.
İrfan içün küreş aile tarihıdır. Onıñ qorantasında bu sport nesilden nesilge keçe edi. İşte bu sebepten sportçu balalıqtan berli ögüne büyük maqsat qoyğan.
"Menim ailem küreşnen oğraşa edi. Men balalıqtan küreşnen oğraşam. Başlağanda, maqsadım — Olimpiada oyunlarına barıp, altın qazanmaq edi", — dep sportçu añlattı.
İrfan Qırımda doğdı. "Qırım — menim vatanımdır", — dey o. Tolu miqyaslı istilâ başlanğan soñ Lenur Temirovnen beraber qıtaiy Ukrayinağa köçti.
"Bugün biz Poltava vilâyetini temsil etemiz ve aynı zamanda tuvğan Qırımımız — Qırım Muhtar Cumhuriyeti Sport küreşi federatsiyasını temsil etemiz. Kim olğanımıznı iç bir vaqıt unutmaymız. Bütün dünya bilsin ki, Qırım bar, Qırım sportçuları bar", — dep Lenur Temirov ayttı.
İrfannı karyerasınıñ yañı basamağı bekley. Bir qaç aydan soñ o, Avropada keçecek büyükler arasında dünya çempionatında iştirak etecek. Er kün azırlıq köre. Ve bir yıldan soñ Olimpiadağa azırlıq başlanacaq.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
