Baş prokuroqlıqnıñ ofisi, Rusiye Federatsiyası Silâlı quvetleriniñ 40 ayrı deñiz piyade brigadasında hızmet etken Qırımlı rusiyeli arbiy hızmetçisi Vladimir İvanovnı ömür apis cezasına mahküm etmege talap ete. Onı 2025 senesi qara qış ayında Kursk vilâyetinde eki ukrayin esiriniñ öldürüvinde qabaatlaylar.
Mahkeme salonından Suspilne muhbiri bunı bildirdi. Kiçik aynıñ 18-nde Kıyivniñ Şevçenko rayon mahkemesi arbiy hızmetçige qarşı dava boyunca munaqaşa keçirdi.
O, Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) doğdı, Çelâbinsk vilâyetinde yaşay edi, Rusiye ordusında añlaşma boyunca hızmet ete edi.
Mahkeme oturışında İvanov qabaatını tanıdı. Advokat, onıñ peşman olıp-olmağanını sorağanda o: "Ebet, peşmanım", — dep ayttı.
Prokuror Mıhaylo Neçıtalyük, qabaatlanğan şahısnıñ qabaatını ilk sefer qabul etmegenini qayd etip, ömürlik apis cezasını talap etti.
"Qabaatlanğan İvanovğa ceza tayin etkende, yapılğan cinaiy cinayetniñ ciddiyligini köz ögüne almağa rica etem. Yani, bu pek ciddiy bir cinayet. Mahkeme oturışında qabaatlı olğanına dair munasebeti — qabaatlanğan adam defalarca qabaatını tanıdı. Em de cezalarnı yımşatqan ya da ağırlaştırğan sebepler tapılmadı", — dep o ayttı.
İvanovnı qorçalağan bedava uquqiy yardım advokatı da imayesi altında bulunğan şahıs qabaatını tanığanını qayd etti.
Atıp öldürilgen arbiy hızmetçilerniñ biriniñ qorantası temsilcisi Oleksandr Klımçuk, Suspilne Qırımğa bergen izaatında, imayeciler 100 million ğrıvnâ miqdarında maneviy tazminat talap etkenlerini bildirdi. Oleksandr Klımçuk — elâk olğanlarnıñ hızmetçi-qardaşı, olarnen beraber batalyonda hızmet etken edi.
"Başta ne olğanını añlap olamadıq, dronlar uçtı, olarnı tapmağa tırıştıq", — dep imayeciniñ vekili ayttı.
İvanovnı mahsus operatsiyalar quvetleriniñ askerleri bu yerde ücüm etkende tutıp aldılar.
"Mahsus operatsiyalar quvetleri temizlev ya da ücüm areketlerine kettiler ve biz qarşı ücüm etkende duşman quvetlerini taptılar, olarnı yaqaladılar, digerlerini ise yoq ettiler", — dep Oleksandr Klımçuk ayttı.
Nevbetteki oturış kiçik aynıñ 20-ne planlaştırıla, anda üküm çıqarılacaq.
İvanovğa qarçı açılğan dava aqqında ne bilemiz
Vladimir Ivanov — Rusiye Federatsiyası Silâlı quvetleriniñ 40-ıncı ayrı deñiz piyade brigadasınıñ esir askeri. İvanov (soyadı "Yarıy") daa üç Rusiye arbiy hızmetçisinen (soyadları "Belıy", "Bum" ve "Lebed") "Râzan" arbiy hızmetinde belgisiz komandan emrini yerine ketirgenlerinde ve eki esir ukrayin arbiy hızmetçisine Kalaşnikov avtomatlarından ateş açqanlarında qabaatlana. Bu 2025 senesi qara qış ayınıñ 9-nda Kursk vilâyetiniñ Sudja rayonınıñ Guevo köyünden cenüp-şarqta ormanda oldı. Esir alınğan Ukrayina arbiy hızmetçileri elâk oldılar.
İvanov, Ukrayina Ceza qanunnamesiniñ 28-inci maddesiniñ 1-inci qısmı ve 438-inci maddesiniñ 2-nci qısmına istinaden qabaatlana. O, ömürlik apis cezasına üküm etile bile.
Qabaatlanğan Vladimir İvanov 53 yaşında, Sevastopolda (Aqyarda) doğdı, Rusiyeniñ Çelâbinsk vilâyetindeki Ozörsk şeerinde yaşay edi, mahkemege 13 yaşındaki qızı bar olğanını bildirdi. Onıñ aytqanına köre, 2024 senesi ilk qış ayında Rusiye ordusına çağırıldı ve añlaşma esasında hızmetke kirdi. Eki aftalıq talimlerden soñ onıñ bölügini Kursk vilâyetine yolladılar.
Arman ayınıñ 29-nda ilk mahkeme oturışından evel İvanov qabaatını tanıdı, tövbe etti, qabaatlavğa itiraz etmedi ve şaatlıq etmege razı oldı. Bu davanıñ üç qurbanı — mahkeme oturışlarında iştirak etmegen elâk olğanlarnıñ tuvğanlarıdır. 2025 senesi arman ayında mahkemeci Slobodânükniñ bildirgenine köre, zarar körgenlerden biri dava açtı ve Rusiye Federatsiyasından qabaatlanğanğa 100 million ğrıvnâ tazminatını talap ete.
Boş aynıñ 3-nde olğan oturışta mahkeme İvanovnıñ davasında yazılı delillerni baqıp çıqqanını yekünledi. Mahkemede, Ivanovnıñ yanında bulunğan diger esir alınğan Rusiye arbiy hızmetçileri ile eki tahqiqatçı deñevleriniñ videolarını numayış ettiler. Bundan da ğayrı, qurşun atılğan yerni köstergen, USQniñ arbiy hızmetçisiniñ drondan çıqarğan videosı bar.
Mahkeme ilk qış ayınıñ 5-nde keçken oturışta şaatlarnı sorğuğa keçti: o vaqıt mahkemede Ukrayina Silâlı quvetleriniñ askeri çıqışta bulundı.
Telegram, WhatsApp, Facebook, TikTok ve YouTubede Suspilne Qırım habelerine abune oluñız
