İşğal etilgen Qırım yapma göllerinde 340 künge yetecek suv yedekleri bar, lâkin Aluştada vaziyet daa qıyın — anda 132 künge suv qaldı.
TASS Rusiye devlet agentligi, işğalli "suv hocalığı ve abadanlaştıruv eyyetğ"niñ malümatına esaslanıp, bu aqqında yazdı.
"Eyyet"niñ malümatına köre, işğal etilgen Qırımnıñ bütün yapma gölleriniñ umumiy miqdarı tahminen 144 million kubometr suvnı teşkil ete. Eñ az suv yedegi Keriç, Feodosiya (Kefe) ve Sudaq şeerlerinde yaşağan insanlarnı, Keriç rayonınıñ mesken yerlerini temin etken şarqiy Qırımnıñ yapma göllerinde, em de Aluşta ealisini suvnen temin etken Körbekül yapma gölünde qayd etile.
"Bu şaraitte qayd etilgen miqdarlar Qırım yarımadasınıñ ealisini ve iqtisadiyat obyektlerini suvnen temin etmek içün, kelecekte yapma göllerine suv berilmesini esapqa almadan, 340 kün devamında yeterlidir, hususan Aluşta şeer bölgesinde ise 132 künge yeterli", — dep "eyyet" qayd etti.
Hatırlatamız ki, ilk qış ayınıñ 8-nden itibaren işğal etilgen Aluştadaki Körbekül yapma gölüniñ suv seviyesi alçaq olğanı sebebinden suv berüv cedveli kirsetildi. Milliy muqavemet merkezi bildirdi ki, bu areketler ağlarda yañı felâketlerge yol aça.
Bundan evel Qırımtatar resurs merkeziniñ mütehassısı ve Kıyiv-Moğıla akademiyasınıñ tabiat ilimleri fakultetiniñ dekanı Yevhen Hlobıstov bildirdi ki, Körbekül yapma gölüniñ quruv meselesi muntazam ola ve iklim deñişmeleri, suv qullanuvınıñ artması ve suv berilmesiniñ alternativ menbalarınıñ olmamasınen bağlıdır.
Onıñ qayd etkenine köre, Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) ve Yalta şeerleri suv qıtlığından zarar körmey, Merkeziy ve Şimaliy Qırım ise alâ daa zarar körip turacaq.
"Qırım ayrı imtiyazlı ve ayrı imtiyazlı olmağan rayonlarğa bölünecek. Arbiy-FSB siyasiy reberligi oturğan yerde suv meselesi olmaycaqtır. Qırımnıñ bütün diger topraqları zarar körecek", — dep mütehassıs qayd etti.
Telegram, WhatsApp, Facebook, TikTok v YouTubede Suspilne Qırım haberlerine abune oluñız
