İşğal etilgen Aluştada suv teminatı vaziyeti kerginleşe: aşarı qullanılğan ağlar, resurslarnıñ qıtlığı ve suv berüv cedveli ağlarda yañı qazalarğa yol aça. Aynı vaqıtta işğalli memurlar tariflerni arttırmağa planlaştıralar.
Milliy muqavemet merkezi bunı bildirdi.
"Aluştada suv buhranı devamlı ola: resurs qıtlığı ve ağlarnıñ aşırı qullanılması devamlı felâketlerge yol açtı, suv berüv cedveli ise olarnı daa da kerginleştire. Düzenli açuv ve söndürüvler gidroşoklarnı meydanğa ketire, yañı qazalar ve zararlarnı ketire, kerçekten de bildirilgen tutumlıqnı yoq ete. Buña baqmadan, meseleniñ astyapı hususiyetleri añlı şekilde ekinci planğa qoyula", — dep haberde qayd etildi.
Onıñ bildirgenine köre, işğalli akimiyet yerli sakinlerni suvnıñ çoq qullanuvında qabaatlay ve fiyatlarnı kötermeknen qorquza.
"İşğalli akimiyetniñ açıq laflarında, müşteriler mesüliyetlidir. Suv qıtlığı, çoq yıllıq ağlarnıñ bozulması ve yatırımlarnıñ olmaması neticesinde degil de, "aşırı istimal" ve "eali terbiyesi" neticesinde peyda oldı. Böyleliknen, daa da ciddiy maliyeviy qararlarnıñ alınması içün temel teşkil etile. Suv teminatı cedvelinden vazgeçüv stsenariyi kösterile, aynı vaqıtta bütün abuneciler içün fiyatlarnıñ köterilmesi planlaştırıla. Asılında, mobilizatsiya idare etüv modeli aqqında söz yürsetile: sistemalarnı tamir etmek ve astyapını yañartmaq yerine, maliyeviy basqı vastasınen istimalnı eksiltmege tırışalar", — dep MMM añlattı.
MMMniñ menbaları bildirdi ki, işğalli akimiyet tariflerniñ köterilmesini qanuniy olaraq tasdıqlamaq içün mahsus uquqiy rejimni ya da atta fevqulâde vaziyet rejimini kirsetmek imkânını baqa.
Hatırlatamız ki, orta küz ayınıñ 1-nden başlap işğal etilgen Aluştada suv cedvelge köre berile. İşğalciler bu sıñırlavlarnı Qırımdaki Körbekül yapma gölünde suv yetmezliginen añlattılar.
"Voda Krıma" şirketiniñ baş müdiri Maksim Novik bildirdi ki, suv berüv cedveli eñ az ilk qış ayınıñ 24-ne qadar devam etecek. İşğalciler, yapma göllerinde suv toplamağa imkân berecek yağanaqlar bekley. O, "Sputnik v Krımu" radiosınıñ canlı yayınında bu aqqında ayttı, dep RİA "Novosti Krım" bildirdi.
"Biz yağanaqlar bekleymiz. Boş ve ilk qış aylarında yağğan az yağmurlar bile aqımnı köstere... Yağanaqlarğa diqqat etecekmiz — şimdi toplanuv devri: qara qış, kiçik, saban, çiçek ayları. Bu sebepten biz vaziyetni nezaret etecekmiz ve suv cedvelge köre berilip-berilmeycegini, ya da kurort mevsimini raat keçirmege imkân berecek seviyege çıqacaqmızmı qarar alacaqmız", — dep Novik bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
