İşğal etilgen Qırımda Rusiye quvet strukturaları yerli sakinlerge qarşı repressiyalarnı devam ete. Keçken afta devamında "devlet hainligi", "terroristik faaliyet" ve "zorbalıqqa çağıruv" qabaatlavları ve yarımadanıñ tışına mahküm etilgenlerniñ yollanılması boyunca yañı cinaiy davalar qayd etildi.
Suspilne Qırım yarımadada keçken afta yüz bergen taqiplerniñ esas adiselerini topladı.
Moskva vilâyetiniñ sakini Qırımda "devlet hainligi" içün mahkeme etilecek
İşğal etilgen Qırımda Rusiye quvetçileri tarafından "devlet hainligi" ve "Ukrayina havfsızlıq hızmetinen işbirligi"de qabaatlanğan Moskva vilâyetiniñ sakini mahkemege çıqacaq. Bu aqta Qırımnıñ işğalci "prokuraturası" bildirdi.
İşğalci tahqiqatnıñ versiyasına köre, qadın "mahsus arbiy operatsiyağa" qarşı çıqqan ve "UHH" vekili ile bağ tutqan. Rusiye uquq qoruyıcıları deyler ki, o, "Rusiye Federatsiyasınıñ havfsızlığına qarşı areketlerde yardım etmege azır olğanını" bildirdi.
İşğalci memuriyetinde bildirdiler ki, 2024 senesi kiçik ayda qadın "kurator"nıñ emri ile Rusiye Silâlı quvetleriniñ zırhlı tehnikanen turağan yerini videoğa çıqarıp, içtimaiy ağlar vastasınen "çetel devletniñ temsilcisine" yolladı. Cinaiy davanı Qırımnıñ işğalci Yuqarı mahkemesine yollaylar.
İçtimaiy ağlarda yazğanları içün beş yıl apis cezası
Rusiyeniñ Krasnodar ülkesindeki mahkeme işğal etilgen Qırım sakinini içtimaiy ağlarda "Rusiye siyasiy ve devlet erbaplarına qarşı zorbalıqqa çağıruvlar"nı yazğanı içün umumiy rejimli müstemlekede beş yılğa üküm etti.
Tahqiqatnıñ malümatına köre, 2022 senesi saban ayında adam içtimaiy ağlarda "Rusiye Federatsiyasınıñ siyasiy ve devlet erbaplarına ücüm etmege" çağırğan yazılarnı derc etti. Yazı açıq irişimde olğanı ve qullanıcılar tarafından faal sürette baqılğanı qayd etildi.
Mahkeme onı qabaatlı tanıp, umumiy rejimli müstemlekede beş yılğa üküm etti. Bundan ğayrı, oña üç yıl devamında saytlarnıñ idare etüvinen bağlı faaliyetnen oğraşmağa yasaq etti.
Dört yıl apis cezasını "Qırım köprüsiniñ patlavını aqlağanı içün" aldı
Rusiyede işğal etilgen Qırımnıñ Canköy rayonınıñ 34 yaşındaki sakini "İnternet ağınıñ qullanuvınen terroristik faaliyetke açıq çağıruvlar, terrorizmni aqlav ya da terrorizm propagandası" (RF Ceza qanunnamesiniñ 205.2-ncş maddesiniñ 2-nci qısmı) içün 4 yılğa mahküm etildi. Tahqiqatnıñ malümatına köre, o, içtimaiy ağlarda Qırım köprüniñ patlatılmasını aqlağan edi.
"Moskvanıñ 2-nci Ğarbiy bölgesi arbiy mahkemesi Qırım sakinini qabaatlı tanıp, oña umumiy rejimli müstemlekede dört yıllıq apis cezasını berdi", — dep FSB bildirdi.
Tahqiqatnıñ malümatına köre, adam Telegram kanalınıñ idarecisi edi, anda Qırım köprüniñ patlatılmasını aqlağan yazılarnı yazğan edi. Rusiye tilşınaslıq ekspertizası bu malümatnı "terrorizmni aqlavı" olaraq tanıdı.
Aqyarda 19 yaşında erkekni "terakt" yapqanı içün tuttılar
İşğal etilgen Sevastopolda (Aqyarda) 19 yaşındaki bir adam tutuldı ve oña qarşı "terroristik areketler" maddeleri boyunca cinaiy dava açıldı. Oña 20 yılğa qadar apis cezası berile bile. Adamnı apiske aldılar.
Taqiqatnıñ malümatına köre, yaqalanğan adam şeerge "ukrayin kuratorlarınıñ vazifesi"ne köre keldi, astyapı obyektlerini teşkerdi, ve İnkerman demiryol stantsiyasında ve Nahimovsk rayonında transformator elektrik stantsiyasında donatmalarnı ateşke bermege tırıştı.
"İş vazifesi çerçivesinde adam demiryol dolabın açmağa tırıştı ve İnkerman demiryol vokzalında batareya dolabını ateşke berdi, bundan soñ Nahimovsk rayonında transformator elektrik stantsiyasını ateşke bermege tırıştı", — dep haberde qayd etildi.
"SBU malümatınıñ berilmesi" davasınıñ mabüsi Qırımdan 2000 km uzaqlıqta etap etildi
Yalta sakini Dmıtro Pastaşçuk, "UHH" malümatınıñ gizli berilmesinde qabaatlanıp, işğal etilgen Qırımdan Rusiyeniñ Samara vilâyetindeki tüzetüv koloniyasına ketirildi. "Tribunal.Qırım epizodı" uquq qorçalayıcı teşebbüsi bu aqqında bildire.
Daa evel uquq qoruyıcılar, 2023 senesi ilk yaz ayında Yaltada Dmitriy Pastaşçuk ve Valeriy Lizun tutuldı, dep bildirgen edi. İşğalci uquq qoruyıcılar olarnı "Ukrayina mahsus hızmetlerinen işbirlikte bulunğanında" ve yarımadadaki vaziyet aqqında malümat bergeninde qabaatladı.
2024 senesi yazda Pastaşuk altı yıl apis cezasına mahküm etildi. Ceza yerine dair malümat tek şimdi belli oldı. Uquq qoruyıcılar qayd eteler ki, böyle mesafe qurulması, qorantağa ve uquqiy yardımğa irişimni zorlaştıra.
Telegramdaki tefsir içün beş yıl koloniya cezası
Rusiyeniñ Rostov-na-Donu şeerindeki Cenübiy bölgeniñ arbiy mahkemesinde işğal etilgen Qırımnıñ 50 yaşındaki Keriç sakini Vasıl Drosovnı terroristik faaliyetni aqlağanı içün mahküm ettiler. Qabaatlayıcınıñ versiyasına köre, o, Telegramdaki tefsirinde Putinniñ rezidentsiyasına "dron ücümi"ni aqlağan edi.
"Cenübiy bölgeniñ arbiy mahkemesinde bugün qabaatlav qararı çıqarıldı, lâkin qararnıñ tafsilâtları daa belli degil. Qayd etilmeli ki, eki kün evelsi Moskvadaki 2-nci Ğarbiy bölgeniñ arbiy mahkemesi aynı maddege istinaden Canköy rayonınıñ sakinini Keriç köpründe patlavnı tasdıqlağanı içün mahküm etip, dört yılğa apiske aldı", — dep haberde qayd etildi.
Uquq qorçalayıcılar qayd eteler ki, halqara gumanitar uquq işğalli akimiyetni işğal etilgen topraqlarnıñ sakinlerini yalıñız mahsus teşkil etilgen yerli mahkemelerde mahküm etmege mecbur ete.
"2025 senesi 159 yaqalanuv qayd etildi, 48 —tamır qırımtatar halqınıñ vekilleri ile bağlı. Qırım sakinleri Rusiyede yasaq etilgen teşkilâtlarğa alâqası bar olğanından şübheli sayılıp, "Rusiye Federatsiyasını itibardan tüşürüv", "casuslıq", "devlet hainligi", "terroristik akt" ve ilâhre sebebinden tutuldı", — dep QRM idare reisi, Meclis azası Eskender Bariyev qayd etti .
Bundan da ğayrı, 2025 senesi uquq qoruyıcılar 333 adaletli mahkeme aqqı bozulğanını qayd etti, olardan 150 — qırımtatarlarğa nisbeten. Sağlıq aqqınıñ bozuluvı ile bağlı 76 adise qayd etildi, esasen SİZO ve koloniyalarda tıbbiy yardım kösterilmegen siyasiy mabüslernen bağlı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
