Rusiyeniñ Rostov-na-Donu şeerindeki Cenübiy bölgeniñ arbiy mahkemesinde işğal etilgen Qırımnıñ 50 yaşındaki Keriç sakini Vasıl Drosovnı terroristik faaliyetni aqlağanı içün mahküm ettiler. Qabaatlayıcınıñ versiyasına köre, o, Telegramdaki tefsirinde Putinniñ rezidentsiyasına "dron ücümi"ni aqlağan edi.
Qara qış ayınıñ 15-nde "Tribunal. Qırım epizodı" uquq qorçalayıcı teşebbüsi Telegramda bunı bildirdi.
"Cenübiy bölgeniñ arbiy mahkemesinde bugün qabaatlav qararı çıqarıldı, lâkin qararnıñ tafsilâtları daa belli degil. Qayd etilmeli ki, eki kün evelsi Moskvadaki 2-nci Ğarbiy bölgeniñ arbiy mahkemesi aynı maddege istinaden Canköy rayonınıñ sakinini Keriç köpründe patlavnı tasdıqlağanı içün mahküm etip, dört yılğa apiske aldı", — dep haberde qayd etildi.
Uquq qorçalayıcılar qayd eteler ki, halqara gumanitar uquq işğalli akimiyetni işğal etilgen topraqlarnıñ sakinlerini yalıñız mahsus teşkil etilgen yerli mahkemelerde mahküm etmege mecbur ete.
Daa bildirildi ki, Rusiye mahkemecileri Denis Stepanov ve Roman Vladimirov, kerekli mahkeme protseduraları olmağanı sebebinden, repressiyalar kibi tanılğan ve insanlıqqa qarşı cinayet olaraq tanıla bilecek tefsirleri içün taqip etile. Bu kibi cinayetlerniñ cezalandıruv müddeti yoq.
2025 senesi Ukrayinanıñ işğal etilgen topraqlarında siyasiy sebeplerden etilgen taqiplerniñ sayısı bayağı arttı. "Memorial PZK" uquq qoralayıcı leyhasınıñ malümatına köre, Qırımda olarnıñ sayısı bütün Rusiyede olğanından 3,5 qat ziyade, diger işğal etilgen vilâyetlerde ise — 7 qat ziyade oldı.
İnsanlarnı "devlet hainligi", "casuslıq", "terrorizm" ve "aşıcılıqnı maliye etüv" maddelerinde qabaatlaylar. Talilcilerniñ qayd etkenine köre, 2025 senesiniñ üçünci kvartalında davalarnıñ sayısı arttı.
Suspilne Qırım muarririyeti Qırımda 2025 senesi devamında olıp keçken repressiyalar aqqında ayma-ay, muayyen davalar, adları ve ükümlerini añlattı.
Putinniñ rezidentsiyasına "ücüm" aqqında ne bilemiz
Rusiye tış işler naziri Sergey Lavrov bildirdi ki, Ukrayina ilk qış ayınıñ 29-na keçer gecesi Novgorod vilâyetinde Putinniñ rezidentsiyasına ücüm etti. Onıñ aytqanına köre, Rusiye muzakerelerde "öz nazar noqtasını ğayrıdan baqa bile", em de cevap ücümini azırlay.
Prezident Volodımır Zelenskıy Lavrovnıñ beyanatını red etti. Onıñ fikrine köre, böyleliknen Rusiye muzakere esnasına keder etmege tırışa ve Kıyivdeki ükümet binalarına ücüm içün temel qoya.
Lavrovnıñ bildirgenine köre, dronlarnıñ sayısı Rusiye Mudafaa nazirliginiñ ilk qış ayınıñ 29-da saba derc etken malümatına zıt kele. Mudafaa nazirliginiñ malümatına köre, gece Novgorod vilâyetinde başta 18 dron, soñra daa 23 UUA tüşürildi.
Trump, İsrail baş naziri Benyamin Netanyagunı qabul etken Mar-a-Lagoda jurnalistlernen subetleşken vaqıt, başta Novgorod vilâyetinde yüz bergen vaqia aqqında malümatnıñ bar olğanını red etti. Faqat bir qaç daqqadan soñ, saba Moskvanıñ telefon bağlanmasınıñ neticelerini tarif etip, Trump fikrini deñiştirdi ve "pek açuvlanğanı"nı ayttı.
AQŞ prezidenti Donald Trump qara qış ayınıñ 4-nde Rusiye tarafından bildirilgen Putinniñ rezidentsiyasına yapılğan Ukrayina ücümine inanmağanını bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
