Rusiyede işğal etilgen Qırımnıñ Canköy rayonınıñ 34 yaşındaki sakini "İnternet ağınıñ qullanuvınen terroristik faaliyetke açıq çağıruvlar, terrorizmni aqlav ya da terrorizm propagandası" (RF Ceza qanunnamesiniñ 205.2-ncş maddesiniñ 2-nci qısmı) içün 4 yılğa mahküm etildi. Tahqiqatnıñ malümatına köre, o, içtimaiy ağlarda Qırım köprüniñ patlatılmasını aqlağan edi.
Qara qış ayınıñ 15-nde RİA "Novosti Krım" teşviqiy haber agentligi, Rusiye FSBsiniñ Qırım ve Sevastopoldaki (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki addaki) idaresiniñ matbuat hızmetine esaslanıp, bunı bildirdi.
"Moskvanıñ 2-nci Ğarbiy bölgesi arbiy mahkemesi Qırım sakinini qabaatlı tanıp, oña umumiy rejimli müstemlekede dört yıllıq apis cezasını berdi", — dep FSB bildirdi.
Tahqiqatnıñ malümatına köre, adam Telegram kanalınıñ idarecisi edi, anda Qırım köprüniñ patlatılmasını aqlağan yazılarnı yazğan edi. Rusiye tilşınaslıq ekspertizası bu malümatnı "terrorizmni aqlavı" olaraq tanıdı.
Bundan evel bu Qırım sakini Rusiye tarafından "nazistlerniñ reabilitatsiyası" sebebinden mahküm etilgen edi ve eki yıl müstemlekede keçirdi.
Bundan evel Rusiyeniñ Krasnodar ülkesindeki mahkeme işğal etilgen Qırım sakinini içtimaiy ağlarda "Rusiye siyasiy ve devlet erbaplarına qarşı zorbalıq çağıruvları"nen yazısı içün umumiy rejimli müsemlekede 5 yılğa üküm etti.
2025 senesi Ukrayinanıñ işğal etilgen topraqlarında siyasiy sebeplerden yapılğan taqiplerniñ sayısı bayağı arttı. "Memorial PZK" uquq qorçalayıcı leyhasınıñ malümatına köre, Qırımda olarnıñ sayısı bütün Rusiyede olğanından 3,5 qat ziyade, diger işğal etilgen vilâyetlerde ise — 7 qat ziyade.
İnsanlarnı "devlet hainligi", "casuslıq", "terrorizm" ve "aşırıcılıqnı maliye etüv"de qabaatlaylar. Talilcilerniñ qayd etkenlerine köre, 2025 senesiniñ üçünci kvartalında davalarnıñ sayısı arttı.
Suspilne Qırım muarririyeti Qırımda 2025 senesi devamında olıp keçken repressiyalar aqqında ayma-ay, muayyen davalar, adları ve ükümlerini añlata.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
