2025 senesi Rusiye işğal etilgen Qırım sakinlerine, hususan qırımtatar halqına qarşı repressiyalarnı devam ettirdi. 40 tintüv, 159 yaqalanuv ve 245 apiske alınuv qayd etildi, olarnıñ çoqusı tamır qırımtatar halqınıñ vekillerine ait edi.
Kıyivdeki Qırımtatar Resurs Merkezi tarafından taqdim etilgen insan aqları bozuluvları talili bu aqqında söz yürsete.
Uquq qorçalayıcılar, taqipler sistematik tarzda alıp barılğanını ve adaletli mahkeme, tibbiy yardım ve şahsiy telükesizlik aqqınıñ bozuluvı ile beraber ketkenini qayd eteler.
"2025 senesi 159 yaqalanuv qayd etildi, 48 —tamır qırımtatar halqınıñ vekilleri ile bağlı. Qırım sakinleri Rusiyede yasaq etilgen teşkilâtlarğa alâqası bar olğanından şübheli sayılıp, "Rusiye Federatsiyasını itibardan tüşürüv", "casuslıq", "devlet hainligi", "terroristik akt" ve ilâhre sebebinden tutuldı", — dep QRM idare reisi, Meclis azası Eskender Bariyev qayd etti .
Bundan da ğayrı, 2025 senesi uquq qoruyıcılar 333 adaletli mahkeme aqqı bozulğanını qayd etti, olardan 150 — qırımtatarlarğa nisbeten. Sağlıq aqqınıñ bozuluvı ile bağlı 76 adise qayd etildi, esasen SİZO ve koloniyalarda tıbbiy yardım kösterilmegen siyasiy mabüslernen bağlı.
Qırımdaki siyasiy mabüslerniñ vaziyeti qasevetlendire. QRM malümatına köre, olardan 10-sı saqat, eñ azından 28-i esli-başlı, ve yaramay şaraitler neticesinde ölümler de oldı.
"Şimdilik, malümatımızğa köre, Qırımnıñ 10 siyasiy mabüsi saqat olaraq qayd etildi. Bundan da ğayrı, eñ azından 28 siyasiy mabüs — qart insanlardır. Olar içün ükümler ölüm ola bile", — dep QRM-niñ kommunikatsiyalar idarecisi Tetyana Savçuk qayd etti.
Tutulğan ve taqip etilgenlerden ğayrı, QRM eñ azından 12 zorbalıqnen ğayıp olğan insannı qayd etti. Uquq qoruyıcılar, insanlarnıñ qorantaları ve advokatları ile bağsız, inkommunikado statusında tutulması ve siyasiy mabüslerniñ Rusiye vatandaşlığından marum etilmesi ve soñra sürgün etilmesi telükesi ile bağlı yañı tendentsiyağa diqqat ayırdı.
"Bizge ikâyeler ve raqamlar müim. Çünki bu raqamlar, söz ayrı adiseler aqqında degil de, ukrayinlerge, qırımtatarlarğa ve Ukrayina vatandaşlarına qarşı sistematik, genotsid siyaseti aqqında ketkenini isbatlay", — dep Bariyev qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
