İşğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) 19 yaşındaki bir adam tutuldı ve oña qarşı "terroristik areketler" maddeleri boyunca cinaiy dava açıldı. Oña 20 yılğa qadar apis cezası berile bile. Adamnı apiske aldılar.
Qara qış ayınıñ 16-nda RİA "Novosti Krım" haber agentligi, Rusiye FSBsiniñ Qırım ve Sevastopol (Aqyar) şeerindeki idaresiniñ matbuat hızmetine esaslanıp, bunı bildirdi.
Taqiqatnıñ malümatına köre, yaqalanğan adam şeerge "ukrayin kuratorlarınıñ vazifesi"ne köre keldi, astyapı obyektlerini teşkerdi, ve İnkerman demiryol stantsiyasında ve Nahimovsk rayonında transformator elektrik stantsiyasında donatmalarnı ateşke bermege tırıştı.
"İş vazifesi çerçivesinde adam demiryol dolabın açmağa tırıştı ve İnkerman demiryol vokzalında batareya dolabını ateşke berdi, bundan soñ Nahimovsk rayonında transformator elektrik stantsiyasını ateşke bermege tırıştı", — dep haberde qayd etildi.
FSB iddia ete ki, adamnı cinaiy taqipnen qorqutqan "telefon dolandırıcılarınıñ tesirine oğradı".
2025 senesi Ukrayinanıñ işğal etilgen topraqlarında siyasiy sebeplerden etilgen taqiplerniñ sayısı bayağı arttı. "Memorial PZK" uquq qorçalayıcı leyhasınıñ malümatına köre, Qırımda olarnıñ sayısı bütün Rusiyede olğanından 3,5 qat ziyade, diger işğal etilgen vilâyetlerde ise — 7 qat ziyade oldı.
İnsanlarnı "devlet hainligi", "casuslıq", "terrorizm" ve "aşıcılıqnı maliye etüv" maddelerinde qabaatlaylar. Talilcilerniñ qayd etkenine köre, 2025 senesiniñ üçünci kvartalında davalarnıñ sayısı arttı.
Suspilne Qırım muarririyeti Qırımda 2025 senesi devamında olıp keçken repressiyalar aqqında ayma-ay, muayyen davalar, adları ve ükümlerini añlattı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
