İşğal etilgen Qırımda tibbiyet, tasil, qurucılıq, sanayı, köy hocalığı saalarında mütehassıslar qıtlığı qayd etile. Bir namzetke bir qaç vazife bar.
RİA "Novosti Krım" işğalli agentligi, kadrlarnı saylav reberi Anastasiya Gontarnıñ malümatına esaslanıp, bu aqqında yazdı.
"Beş-yedi yıl evelsi iş berüvi, belli bir sayıda namzetten hadimlerni saylap almaq içün bayağı vaqıt sarf etken olsa, bugünde-bugün bir namzetke bir qaç boş yer bar", — dep Gontar ayttı.
Onıñ aytqanına köre, işğal etilgen Qırımda bir saaki ihtisaslı ekimler, orta tibbiyet hadimleri, ocalar ve köy hocalığı ve sanayı saasında çalışmağa azır olğan hadimler yetmey.
"Şimdi sağlıq saqlav saasında büyük bir qıtlıq bar — bütün tıbbiy mütehassıslar — onkologlar, endokrinologlar, kardiologlar, nevrologlar, anesteziologlar. Em de orta seviyede tibbiy hadimler — emşireler, ekimler — pek az. Turizm, qurucılıq ve İT saalarında işçiler az. Ocalar, aliy oquv yurtlarınıñ ocaları yetmey. Qırım köy hocalığı şimdi ihtisaslı mütehassıslarğa muhtac, belli bir qabiliyetler kerek olğan istisal modernizatsiyası yapıla", — dep Gontar qoştı.
Onıñ malümatına köre, Qırımda yuqarıda qayd etilgen zenaatlarğa talap qalacaq.
"Pandemiya neticesinde mütehassıslarnıñ çoqusı "uzaqtan iş"ke keçti. Umumen çalışqan ealiniñ sayısı eksile. Demek ki, istisal ve diger saalar içün kerek olğan insan sayısı bazar ihtiyaclarını qarşılamay. Adamlarnıñ sayısı bayağı eksildi. Ve bu tendentsiya kelecek on yıllarda da devam etecek", — dep "mütehassıs" tüşüne.
Hatırlatamız ki, ilk küz ayında işğal etilgen Simferopolnıñ (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adniñ) tibbiyet ve tasil saasındaki bücet hadimleri aylıqlarını eksilttiler. İşğalciler em ocalarnı, em de ekimlerni aylıqlarnıñ qısqartıluvı aqqında evelden haberdar etmediler, dep "Sarı şerit" qarşılıq areketi Telegramda bildirdi.
İşğalcilerniñ malümatına köre, Qırımda 818 ekim ve 1076 feldşer yetişmey. Rusiye akimiyeti yarımadağa ekimlerni celp etmek içün qoşma para teklif ete — ekimler içün bir million ruble ve orta tibbiy hadimler içün yarım million ruble. Böyleliknen, er yıl işğalciler Qırımnıñ tibbiy müessiselerine köy ve küçük şeerlerde çalışmaq içün birinci nevbette 100 ekim celp etmege planlaştıralar.
Daa evel Suspilne Qırımnıñ subetdeşi adınıñ bildirilmemesi şartınen ekimler ne içün işten boşatılğanını, tibbiy hadimlerniñ qıtlığı, yañı "reberlik”niñ yerli hadimlerge nisbeten munasebetini ve bücet parasınıñ kerçekten ne yerde ketkenini añlattı.
Bu arada işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) Rusiye kontrolindeki "qanun çıqarıcı toplaşuv" yerli iş bergenlerni "SVO iştirakçileri" içün iş yerlerini ayırmağa mecbur etken qanun leyhasını qabul etti. Yañı qaidelerge binaen, iş bergenler Ukrayinağa qarşı arbiy areketlerniñ iştirakçileri içün mahsus iş yerlerini açmalılar ve ayırmalılar. Em de, iş hızmetleri iş qıdırğan vaqıt er bir iş adamına şahsiy yardım kösterecek olalar.
İşğal etilgen Sevastopol (Aqyar), Simferopol (Aqmescit) ve Yalta şeerlerinde de azbarcı, aydavcı, kommunal hocalıq hadimleri yoq, çünki olarnı işğalciler cenkke mecburen celp eteler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
