Müstemlekede 12 yılğa üküm etilgen Qırım siyasiy mabüsi Tofik Abdulgaziyevniñ Çelâbinsk apishane hastahanesinde kompyuter tomografiyasından soñ miyinde şişik tapıldı.
Onıñ apayı Aliye Kurtametova Qırım birdemligine bunı bildirdi.
Onıñ aytqanına köre, Abdulgaziyev telefon vastasınen oña şişik aqqında ekim bölüginiñ reberi Olga Angold haber etkenini bildirdi. Siyasiy mabüsni şişikniñ telükeli olıp-olmağanını belgilemek içün neyrocerrahqa yolladılar.
"Şimdi onı neyrocerrahqa alıp ketkenlerini ve ekimniñ aytqanlarını bekleycekmiz. Men Tofik içün pek qasevetlenem. Körme qabiliyetini birden ğayıp etmege başlağanını aytqan soñ, bunıñ kibi bir şeyni tüşündim", — dep Aliye Kurtametova ayttı.
Hatırlatamız ki, 2024 senesi saban ayından berli Abdulgaziyev hastahanede buluna. Oña sıq tarqalğan aqciger tüberküloz hastalığı diagnozı qoyulğan edi.
Bu sene orta küz ayında Abdulgaziyev körme qabiliyetiniñ keskin ğayıp oluvı aqqında bildirdi.
"O, aşamaq kerek olğan tabaqnı körmey. Telefon nomerasına basmaq içün yardım soray, çünki parmaqları divarğa basa. Tofik cemaattan kelgen mektüplerge cevap berip oquyamaz", — dep onıñ apayı bildirdi.
Hastahanege tüşken soñ, Abdulgaziyevniñ apayı ve adliyecisi, sağlıq vaziyeti sebebinden aposten azat etilmesini talap ettiler, lâkin 2024 senesi arman ayında mahkeme bunı red etti.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
